Ерөнхий сайд Л.Оюун-Эрдэнэ Дорнод аймагт ажиллаад буцлаа

Ерөнхий сайд Л.Оюун-Эрдэнэ Дорнод аймгийн удирдлагуудтай уулзах үеэр Хэрлэн сумын 3 дугаар багийн нутаг дэвсгэрт “Бумбат” гэдэг газарт 48 га талбайд 1800 айлын орон сууцны хорооллын дотор шугам сүлжээг барих ажлын зардал 10 тэрбум төгрөгийг Засгийн газраас шийдвэрлэхээ илэрхийлсэн байна.

Мөн "ДБЭХС" ТӨХК-ийн өргөтгөлийн ажлын явцтай танилцжээ. Станцын хүчин чадлыг 50мб-аар өргөтгөх ажил өнгөрсөн 8-р сараас эхэлж, 0 түвшингээс доошхи газар шороо, барилгын арматур зангидах, бетон цутгалтын ажлууд хийгдсэн, гүйцэтгэл 37.5 хувьтай явж байна. Төсөлд нийт 79.5 сая ам.долларын санхүүжилт шаардлагатай. Үүний 60 сая ам.доллартай тэнцэх 420 сая юанийг БНХАУ-аас авч буй Хөгжлийн банкны зээлээр санхүүжүүлэх бол үлдсэн 19.5 сая ам.долларыг Монгол Улсын төсөвт тусгаж байгаа юм. Харин энэ жилийн хувьд улсын төсөвт 6 тэрбумыг тусгажээ. Ерөнхий сайд өргөтгөлтэй танилцах үеэрээ Хөгжлийн банктай байгуулах зээлийн гэрээг яаравчлах, барилга угсралтын ажлыг эрчимжүүлэх зорилгоор төслийн тоног төхөөрөмжийг Дорнод аймаг дахь хилийн боомтуудаар оруулж ирэхэд анхаарна гэдгээ мөн илэрхийлжээ.

МУ-ын Засгийн газрын мөрийн хөтөлбөрт тусгагдсан Чойбалсангийн олон улсын нисэх буудлыг 4С зэрэглэлд шилжүүлэн өргөтгөх ажлын төлөвлөлттэй танилцсан байна. Чойбалсан олон улсын нисэх буудлыг 4С ангиллын болгон хүчин чадлыг нэмэгдүүлж, зорчигч үйлчилгээний барилга, хөөрч буух зурвас нэмж байгуулах 57,0 тэрбум төгрөгийн ажлыг 2022 оны улсын төсөв болон навигацын орлогоос санхүүжүүлэх юм байна.

Ийнхүү тэрбээр Дорнод аймаг дахь томилолтоо өндөрлүүлж, Улаанбаатарыг зорилоо.

Эх сурвалж: https://dornod.net/r/35225