Хөвсгөл аймгийн Эрдэнэбулган сумаас: Гурван сартай баавгайн бамбарууш өдөрт нэг литр сүү уудаг

Хөвсгөл аймгийн Эрдэнэбулган сумын малчин айлд энэ сарын 16-нд эхээсээ төөрсөн бамбарууш ирсэн тухай мэдээллийн мөрөөр манай сурвалжлах баг өчигдөр /2021.05.22/ Хөвсгөл аймгийг зорьсон юм. Бамбаруушийг байгальд нь тавьсан боловч буцаж ирээд байсан тул Эрдэнэбулган сумын удирдлагуудад хандсанаар бамбаруушийг  нэг сар тэжээн, амьдрах чадвартай болохоор нь буцааж тавихаар болжээ. Эрдэнэбулган сумын Байгаль орчин, тогтвортой хөгжлийн бодлогын тасгийн дарга Г.Баярбат бамбаруушийг  тэжээж  байгаа бөгөөд түүнийг өхөөрдөн Миша хэмээн нэрлэсэн байна.

Бамбарууш 2-3 сартай зургаан кг жинтэй, 48 см өндөртэй байгаа  бөгөөд өдөрт 1 литр сүү  ууж байгаа гэнэ. Түүнийг бие даан амьдрах чадвартай болохоор нь буюу ирэх долоодугаар сард жимс, мөөг ургахаар  байгальд тавихаар төлөвлөжээ. Бамбаруушийн эхийг олохоор судлаж байгаа тухай хэлж байна. Өнөөдөр түүнийг тэжээхэд зориулж  аймгийн төвөөс тор авчирч байгаа юм байна. Мөн байгальд тавих үед аюулгүй байдлыг нь хангаж, хянах үүднээс GPS-тэй хүзүүвчийг яамнаас явуулж байгаа гэдгийг хэлж байна. Бамбаруушийг тэжээж буй иргэдийн хэлж буйгаар биед нь орсон байсан хачигийг авсан, одоогоор биеийн байдал хэвийн байгаа гэдгийг мөн хэлсэн юм. Баавгайн бамбарууш 350-500 грамм жинтэй төрдөг. Гурван сартай эм, нялх Миша бамбаруушийг хооллоход жимс, сүү өгөх тухайгаа нутгийн иргэд илэрхийлсээр байгаа бөгөөд одоогийн байдлаар түүнийг сүүний хажуугаар жимс, молокогоор хооллож байгаа ажээ.