Хээрийн сургуулийн үеэр цэргүүдээ хар тамхитай бялуугаар дайлжээ

Канадын зэвсэгт хүчний нисгэгч Чэлси Когсуэлл гэгч эмэгтэйг байлдааны сумаар буудлага хийсэн хээрийн сургуулийн үеэр цэргүүдийн каннабис буюу олсны төрлийн хар тамхи бүхий кексээр дайлж байсныг илчлэн баривчилсан тухай “CTV News” суваг мэдээлсэн байна.

Чэлсид хортой бодис ашигласан 8 зүйл, цэргийн сахилга бат зөрчсөн 9 зүйл, ёс зүйгүй авирласан гэж 1 зүйл гээд нийт 18 зүйл ангиар ял тулгаад байгаа юм байна. Түүний тараасан хар тамхитай кексийг идсэн их бууны ангийн цэргүүд нэлээд хүнд байдалд орсон аж. Тухайлбал, байлдааны сумаар буудлага хийсэн хээрийн сургуулийн үеэр цэргүүд гэнэт үндэслэлгүйгээр хардах, хэт ядрах, ам хэт цангах, барьц алдаж сандралд орох зэрэг шинж тэмдэг илэрч зарим нь зэвсэг ба тэсрэх бодистой аюулгүй ажиллах чадваргүй болсон байна.

Чэлси Когсуэлл нь 2011 оны зургаадугаар сараас зэвсэгт хүчинд алба хааж байгаа бөгөөд одоо ч албан хаагч хэвээр байгаа юм байна. Ямар шалтгаанаар цэргүүдэд мансууруулах бодистой бялуу тараасан нь ойлгомжгүй байгаа бөгөөд Канадын армид өмнө нь ийм хэрэг огт гарч байгаагүй аж. Цэргийн шүүх энэ хэргийг наймдугаар сард авч хэлэлцэхээр болсон юм байна.