Хятадын Ганьсу мужид болсон хэт холын зайн гүйлтийн үеэр цаг агаар огцом муудаж хүйтэрсний улмаас 21 хүн амиа алдсан тухай орон нутгийн хэвлэлүүд мэдээлж байна.
Уулын өндөрлөг газар 100 км гүйх уралдаан бямба гарагт Байнь хотоос холгүй эхэлсэн юм байна. Уралдааны 20 ба 30 дах км-ийн хооронд орон нутгийн цагаар 13 цагийн үед цаг агаар огцом муудаж мөндөр орж, хүчтэй салхилж эхэлсэн байна. Огцом хүйтэрсний улмаас зарим оролцогчид нь замаас гарч, цаг агаар сайжрахыг хүлээхээр шийдсэн ч осгож эхэлжээ.
Амьд гарсан нэг оролцогчийн ярьснаар гүйж байхад гэнэт бороо орж, тамирчдын өөдөөс хүчтэй салхилж эхэлсэн бөгөөд удалгүй хуруугаа мэдрэхээ байж хэл нь хүртэл хөлдсөн тул гүйхээ зогсоож уруудсан байна.
Цаг агаар огцом муудаж эхлэхэд зохион байгуулагчид тэмцээнийг зогсоож, 1200 аврагчдыг дайчлан аврах ажиллагаа эхлүүлжээ. Уралдааны зам дагуу уулархаг газар агаарын хэм огцом буурч 0 градуст хүрсний улмаас 21 тамирчид осгож амиа алдсан байна. Байинь хотын мэр оролцогчдоос уучлал гуйж, эмгэнэлт явдал үүсэхэд хүргэсэн нөхцөл байдлыг шалгах ажлын бүлэг байгуулсан тухай мэдэгджээ. Хэргийн талаар мөрдлөг явуулсан сэтгүүлчид Ганьсу мужийн цаг агаарын албанаас уралдаан болох өдрүүдэд тус мужид хүчтэй салхилж, агаарын хэм огцом буурч, мөндөр орох тухай мэдээлсэн болохыг тогтоожээ. Мөн цаг агаарын албанаас уралдаан зохион байгуулагчдад цаг агаарын таагүй үзэгдэл болох тухай тусгай анхааруулга хүргэсэн гэж мэдээлсэн байна.
Сэтгэгдэл (0)
Сэтгэгдэл бичигдээгүй байна