АНУ-ын Конгрессын Төлөөлөгчдийн танхимын Гадаад хэрэг хариуцсан хорооны тэргүүн Грегори Микс нь Хятадын нөлөөг эсэргүүцэх тухай шинэ хуулийн төслийг өргөн барьсан байна. Ийм хууль өргөн барих шалтгааныг “Хятад нь хууль дүрэм дээр тогтсон эмх журмыг эвдэлж, АНУ-ын дэлхийд эзэлж байгаа байр суурийг ганхуулах гэж улам бүр хичээж байна. Бид Хятадаас гарч байгаа бодит аюулд анхаарал хандуулж, хүчээ дайчлах шаардлагатай болоод байна” гэжээ.
Ийнхүү АНУ нь Оростой харилцаагаа сайжруулах оролдлого хийхтэй зэрэгцээд Хятадын эсрэг чиглэсэн бодлогоо улам бүр чангатгаж байна. Тухайлбал, Хятадын олон улсын нөлөөг хумихад чиглэсэн арга хэмжээг маш эрчимтэй авч байгааг шинжээчид онцолжээ. Жишээлбэл, Хятад нь Арабын Нэгдсэн Эмирт улсуудтай батлан хамгаалах салбарт маш идэвхтэй хамтран ажиллаж байгааг АНУ-ын тагнуулын албад илрүүлсэн тухай “The Wall Street Journal” бичсэн байна. Сүүлийн хэдэн долоо хоногийн дотор Хятадын армийн мэдлийн ачаа тээврийн хоёр ч онгоц АНЭУ-д газардаж, юу ч мэдэгдэхгүй техник хэрэгсэл зөөж авчирсныг Америкийн тагнуулын алба тогтоожээ. Улмаар хэрэв Арабын Нэгдсэн Эмирт улсууд нь Хятадаас зэвсэглэл худалдан авч байгаа нь тогтоогдвол Америкийн зүгээс тус улсад 23 тэрбум долларын хамгийн орчин үеийн зэвсэглэл худалдах тухай шийдвэр сөргөөр нөлөөж магадгүй гэдгийг “The Wall Street Journal” онцолжээ. Мөн АНЭ улсууд нь Хятадтай батлан хамгаалах салбарт цаашид идэвхтэй хамтран ажиллах бол тус улсад нийлүүлж байгаа Америкийн орчин үеийн зэвсэг техникийг Хятадын талд танилцуулахгүй гэсэн баталгаа шаардаж магадгүй юм байна.
АНУ нь Трампын үед Арабын Нэгдсэн Эмирт улсуудад F-35 сөнөөгч онгоц 50 ширхэг, тагнуулын -нисгэгчгүй онгоц MQ-9B-ыг 18 ширхэг гээд 23тэрбум долларын хамгийн сүүлийн үеийн зэвсэг нийлүүлэх гэрээ байгуулсан юм. Гэвч Байден Ерөнхийлөгч болсны дараагаар энэхүү гэрээг дахин шинжилж, үнэлнэ гэсэн шалтгаанаар зэвсэг нийлүүлэх ажлыг түр зогсоогоод байгаа юм. Одоо харин Хятадтай нягт хамтран ажиллаж байгаа мэдээлэл ийнхүү тарсан учир нууцаа Хятадад алдах аюулаар шалтаг хийж, зэвсэг нийлүүлэхээ бүрэн зогсоож ч магадгүй гэдгийг шинжээчид онцолжээ.
Сэтгэгдэл (0)
Сэтгэгдэл бичигдээгүй байна