Аймгийн Засаг даргын үйл ажиллагааны хөтөлбөрт “Ногоон Дархан” төслийг хэрэгжүүлэхээр тусгасан. Энэ хүрээнд агаарын бохирдлыг бууруулах ажлыг үе шаттай зохион байгуулж байна. Дархан сумын агаар, орчныг бохирдуулагч гол эх үүсвэрүүдийн нэг нь “Бараат хог”-ийн цэг. Түүнээс ялгарч буй утаа юм. Тэгвэл 60 жил хуримтлагдсан хур хогийг дарж булшлах ажлыг өнөөдрөөс /2021.06.03/ эхлүүллээ.
Нийт 6.2 км урттай 15 га талбайд 40-60 метрийн гүн жалганд хуримтлагдсан хогийг булж устгахад багадаа 3 орчим тэрбум төгрөг шаардлагатай юм байна. Харин аймгийн Засаг дарга Б.Азжаргал болон холбогдох албаныхан аймаг орон нутагт үйл ажиллагаа явуулдаг уул уурхайн компаниудад хүсэлт тавин харилцан ярилцсаны үр дүнд шатахууны зардлыг нь гарган өгч уг ажлыг сарын хугацаанд гүйцэтгүүлэхээр болсон байна.
"GREEN HEAD" ХХК, "Марал тамирын гол" нөхөрлөл, "Уулс ноён" ХХК, "Ган хүдэр орд" зэрэг компаниуд болон хувь иргэд нийгмийн хариуцлагынхаа хүрээнд тeхникээ гарган аймаг, орон нутагтайгаа хамтран ажиллаж эхэллээ.
Бараат хогийн цэгт жилд дунджаар 50 мянга орчим тонн хог хаягдал буулгадаг байна. Харин дарж булшлах ажлыг дууссаны дараа цаашид хэн дуртай нь хогоо авч ирж хаядаг биш зөвхөн зөвшөөрөлтэй машинууд ирж хог буулгадаг, иргэд ААНБ-д хог буулгах тохиолдолд заасан цэгт хаядаг, сар бүр шороогоор дарж булшилдаг байх хэлбэрлүү шилжүүлэх юм байна. Мөн цэвэрлэсэн талбайдаа ногоон байгууламж бий болгох зэрэг олон ажлыг хийхээр төлөвлөжээ.
Сэтгэгдэл (0)
Сэтгэгдэл бичигдээгүй байна