Ерөнхий сайд яг одоо Замын-Үүд боомтод ажиллаж, ачаа бөөгнөрч байгаа шалтгааныг тодруулж, холбогдох албаныханд тодорхой үүрэг, чиглэлийг өглөө. Тодруулбал Ерөнхий сайд Л.Оюун-Эрдэнэ боомтын ажлын хэсгийг шинээр байгуулж, 30 хоногийн хугацаанд боомт дахь нөхцөл байдал сайжрахгүй, ажил эрчимжихгүй бол боомтод ажиллаж буй албан тушаалтнуудыг бүгдийг нь солих чиглэл өглөө.
Боомтын өргөтгөлийн ажил 20 хувьтай явж байгаа бөгөөд өнөөдрийн байдлаар боомтоор 100 машиныг гаргаж байгаа аж. Жирийн үед өдөрт 300 машин гарч байсан бол Хятадын талаас хязгаарлалт тавьсантай холбоотойгоор дээрх тоо гурав дахин буурч бөөгнөрөл үүссэн гэдгийг албаныхан хэлж байна. Өглөө 07.00 цагаас эхлэн жолооч нарыг дөрвөн ээлжээр буюу 25, 25-аар нь өдөрт 100 жолоочийг гаргаж байна гэв.
Зам тээврийн сайд Л.Халтар энэ үеэр “Өдөрт одоо хилээр 100 машин гарч байна. Жирийн үеийнхээс гурав дахин буурсан учраас хоёр талдаа бөөгнөрөл үүссэн. Өнгөрсөн долоо хоногт би энд ажиллаад урдаас ирсэн машины ачааг Эрээн дээр Монгол воганд шилжүүлсэн. Өдөрт 20 гаруй воган ачааг ачиж байна. Монгол талд хоосон машины бөөгнөрөл үүссэн шалтгаан нь урагшаа гарч байгаа хязгаарлалттай холбоотой. Өөрөөр хэлбэл, өдөрт 100 машин гарах квоттой гэсэн үг. Үндсэндээ одоо нүүрснээс бусад экспорт хязгаарлагдсан учраас 90 орчим хувь нь хоосон байна. Цаашдаа энэ бөөгнөрлийг арилахын тулд Хятадын талтай ярилцаад өдөрт 150-200 хоосон машин урагшаа гаргаад ачаа татна гэсэн төлөвлөгөө гаргаад ажиллаж байна” гэлээ.
S
Сэтгэгдэл (0)
Сэтгэгдэл бичигдээгүй байна