Токиогийн олимпын наадамд амжилттай оролцож мөнгөн медаль хүртсэн Сайед Моллайд, хүрэл медаль хүртсэн Мөнхбатын Уранцэцэг, Цэнд-Очирын Цогтбаатар, Бат-Очирын Болортуяа, дасгалжуулагч Халиуны Болдбаатар, Мөнхбаатарын Бундмаа, Бямбажавын Баттулга нарыг мөнгөн шагналаар шагнах шийдвэрийг энэ сарын 11-ний өдрийн Засгийн газрын хуралдаанаас шийдвэрлэсэн билээ. Тодруулбал, Сайед Моллайд 60 сая, М.Уранцэцэг, Ц.Цогтбаатар, Б.Болортуяа нарт тус тус 30 сая, дасгалжууулагч Х.Болдбаатарт 45, М.Бундмаа, Б.Баттулга нарт тус тус 15 сая төгрөг олгохоор болсон.
Мөн энэ үеэр Ерөнхий сайд Л.Оюун-Эрдэнэ медаль авсан бүх тамирчдад байр өгөхийг чиглэл болгож, холбогдох албаны хүмүүст даалгасан байна. Уг нь журмаараа олимпын наадамд амжилттай оролцсон тамирчдад зөвхөн мөнгөн шагнал өгдөг уламжлалтай.
Түүнчлэн Ерөнхийлөгчийн зүгээс Саеид Моллаей, Ц.Цогтбаатар, Б.Болортуяа нарт Монгол Улсын гавьяат тамирчин цол, олимп дэлхийн хос медалтан болсон М.Уранцэцэгт Монгол Улсын Хөдөлмөрийн баатар цол олгохоор шийдвэрлэсэн байдаг.
Тамирчид Японоос ирээд 14 хоног хөл хорионд байгаа учраас карантины хугацаа дуусгавар болсны дараа дээрх шагналыг олгох юм байна. Уг шийдвэрийг албан ёсоор олон нийтэд зарлаагүйтэй холбоотойгоор Сайед Моллайд Засгийн газарт гомдсон бололтой. Тэрбээр энэ тухай хэвлэлд өгсөн ярилцлагадаа тодотгож, "Монгол Улсын нэрийн өмнөөс мөнгөн медаль хүртсэн мөртлөө надад юу ч өгөөгүйд гомдож байна. Би Монгол Улсын иргэн шүү дээ. Үүнд гомдож байна. 10 хоног зочид буудалд маш тухгүй байсан. Тиймдээ ч би эхнэр, хүүхэд дээрээ эргэж ирсэн" хэмээн ярьжээ.
Сэтгэгдэл (0)
Сэтгэгдэл бичигдээгүй байна