Засгийн газрын ээлжит хуралдаан 08.00 цагт эхэллээ. Хуралдаанаар 15 асуудал хэлэлцэхээр төлөвлөжээ. Хуралдаан бүрийн эхэнд цар тахлын нөхцөл байдал, авч хэрэгжүүлж буй арга хэмжээний талаар мөн 10 их наядын цогц төлөвлөгөөний хэрэгжилт, Авлигын индексийг бууруулах Ажлын хэсгээс авч хэрэгжүүлсэн арга хэмжээний талаар танилцуулдаг уламжлалтай. Үүний дараа хэлэлцэх үндсэн асуудлуудад ордог. Өнөөдрийн Засгийн газрын хуралдаанаар "Өндөржүүлсэн бэлэн байдлын зэрэгт шилжүүлсэн хугацааг сунгах" тухай Засгийн газрын тогтоолын төслийг хэлэлцэнэ.
2021 оны зургадугаар сарын 30-нд Засгийн газрын хуралдаанаар коронавирус халдварын цар тахалтай тэмцэх, эрсдэлийг бууруулах зорилгоор улсын хэмжээнд засаг захиргаа, нутаг дэвсгэрийн нэгж, төрийн болон нутгийн захиргааны байгууллага, хуулийн этгээдийг гамшгаас хамгаалах өндөржүүлсэн бэлэн байдлын зэрэгт шилжүүлсэн хугацааг 2021 оны наймдугаар сарын 31-нийг дуустал сунгасан билээ. Уг хугацааг сунгах эсэхийг шийдвэрлэх юм. Өнөөдрийн байдлаар манай улсад халдварын тархалт өндөр хэвээр, дельта хувилбарын тохиолдол нэмэгдсээр байгаа.
Нийт бүртгэгдсэн тохиолдол 196,846 болж нэмэгдсэн бол уг халдвараар нийтдээ 907 хүн эндээд байна.
Мөн Засгийн газрын хуралдаанаар "Улсын хил нэвтрэх зорчигч, тээврийн хөдөлгөөнийг түр зогсоосон хугацааг сунгах" тухай тогтоолыг хэлэлцэнэ.
Сэтгэгдэл (0)
Сэтгэгдэл бичигдээгүй байна