Пүрэв гарагт Кабулын нисэх буудлын орчим цуврал дэлбэрэлт болж олон хүн амиа алдаж, шархадсан байна. АНУ-ын тагнуулын албадын мэдээлж буйгаар алан хядах ажиллагааг “Лалын улс” бүлэглэлийн амиа золиослогч гүйцэтгэжээ. Дэлбэрэлт болон хохирогчдын талаар АНУ ба талибууд янз бүрийн тайлбар өгч байна.
Жишээлбэл, Пентагон нь хоёр дэлбэрэлт болсноос эхнийх нь нисэх буудал руу орох гол хаалганы орчим, дараагийнх нь нисэх буудлын ойролцоох “Барон” зочид буудлын ойролцоо болсон. Британийн Батлан хамгаалах яам нь эхний дэлбэрэлтийг амиа золиослогч гүйцэтгэж, дараагийн дэлбэрэлтийг тэсрэх бодис бүхий машин дэлбэлж үйлдсэн гэжээ. Харин “Талибан” нь дэлбэрэлтийн тоо хоёроор хязгаарлагдахгүй, өөр олон тооны дэлбэрэлт болсон гэв. Мөн Талибаны төлөөлөгч Забихулла Мужахид нь дэлбэрэлтийг алан хядагчид хийгээгүй харин америкчууд онгоцоор зөөх боломжгүй болсон зарим тоног төхөөрөмжөө дэлбэлсэн тул Кабулын оршин суугчдад айх зүйл байхгүй гэж байсан.
Алан хядах ажиллагааны улмаас хохирсон хүний тооны талаар мөн л янз бүрийн мэдээ гарч байна. “The Wall Street Journal” нь 103 хүн амиа алдсан гэсэн. Харин “CBS“ суваг Афганистаны Эрүүл мэндийн яамны мэдээллийг иш татан 150 гаруй хүн амиа алдсан гэж мэдээлсэн. Дэлбэрэлтийн улмаас амиа алдсан хүмүүсийн дунд хамгаалалтад гарч байсан америк цэргүүд бас байсан нь тогтоогдоод байна. Афганистан дах Америкийн цэргийн удирдлагын мэдээлснээр 13 цэргийн албан хаагч амиа алдаж, 15 нь шархадсан байна.
Хамгийн гол нь Вашингтонд энэ дэлбэрэлтүүдэд “Талибан” хөдөлгөөн хамааралгүй гэж үзэж байгаа юм байна. Ингэснээр ямар ч байсан наймдугаар сарын 31-н хүртэл нисэх буудлын орчим америк цэргүүд ба талибаны хооронд зэвсэгт мөргөлдөөн гарахгүй бололтой. Америкийн цэргийн удирдлагаас Талибан нь дүрвэгсдийг тээвэрлэх ажиллагааг элдэв ээдрээгүйгээр тохирсон хугацаанд дуусгавар болгох сонирхолтой байгаа тул хадлага үйлдэх нь тэдэнд ашиггүй гэж тайлбарлажээ. “Талибан” хөдөлгөөн мөн л энэ халдлагыг буруушаасан мэдэгдэл хийжээ.
Гэхдээ өрнөдийн зарим хэвлэлүүдэд Их Британи болон АНУ-ын Батлан хамгаалах яамд алан хядах ажиллагаа гарцаагүй явагдах гэж байгаа тухай урьдчилж мэдээлсэн атлаа түүнийг таслан зогсоох талаар ямар ч арга хэмжээ авалгүй зүгээр суулаа гэж буруутгасан байна. Харин Америкийн радио хөтлөгч Тодд Странс дэлбэрэлтийн хариуг маш хэрцгийгээр авах ёстой гэж олон хүнийг уриалга тарааж. Тэрэ “Твиттер” дээрээ “Амиа алдсан америк цэрэг нэг бүрийн төлөө Афганистаны нэг хотыг газрын хөрснөөр арчих хэрэгтэй” гэжээ.
Сэтгэгдэл (0)
Сэтгэгдэл бичигдээгүй байна