АНУ ба ОХУ хоорондын шинэ “хүйтэн дайн” ширүүссээр байна. Ялангуяа АНУ-ыг Афганистан, Ливи, Сири гэх мэт газар ил сөргөлдөөнд их бага гутамшигтай ялагдал хүлээх тусам нууц дайн улам ширүүсэж байгаа аж. ОХУ-ын Гадаад яамны хүний эрх ба ардчиллын асуудал хариуцсан төлөөлөгч Григорий Лукьянцевийн хийсэн мэдэгдэл. Тэрээр АНУ-ыг 2008 оноос хойш 13 жилийн турш IT салбар, улсын нууцтай холбоотой Оросын иргэдийн гуравдагч орнуудад амарч, аялж байхад нь ангуучлан баривчилж байна гэж буруутгажээ. Гуравдагч орнуудад тусгай хүсэлт гаргах баривчилсан Оросын иргэдийг АНУ-д авчран зохиомол хэрэг тулган хүлээлгэж, өөрсдийн талд элсүүлж эсвэл хэрэгтэй мэдээллээ олж авдаг юм байна.
Ийм байдлаар АНУ нь 2008 оноос хойш 50 гаруй хүнийг баривчлуулан АНУ-д хүргэжээ. Жишээлэхэд, Роман Селезнев, Олег Кошкин, Петр Левашев гэх IT салбарын өндөр түвшний мэргэжилтнүүдийг хакер дайралт хийсэн, хувийн мэдээлэл хулгайлсан гэх мэт хэргээр ял тулгасан.Хамгийн сүүлд гэхэд л IT технологийн бизнес эрхэлдэг Владислав Клюшин гэдэг бизнесменийг Швейцарт хуурамч урилгаар урьсны дараа Швейцарын Засгийн газар хүсэлт гарган саатуулсан. Одоо Клюшиныг АНУ-ын Эрүүгийн хуулийг зөрчсөн хэргээр Америк руу хүргүүлэх гэж шүүхэд хандаад байгаа юм байна. Харин Оросын талын тайлбарлаж байгаагаар Клюшин Америкийн ямар ч хуулийг зөрчөөгүй, Засгийн газартай гэрээ байгуулж, чухал салбарын программ хангамж боловсруулж байсан учраас тэр программын талаарх нууц мэдээлэл олж авахын тулд ийнхүү баривчлуулсан байна.
АНУ-ын тусгай албаныхан Клюшиныг элсүүлж, нууцыг худалдан авах гэж Францад, Шотландад явахад нь хоёр ч удаа уулзан санал тавиад бүтэлгүйтэж байж. Үүний дараа тэд эвээр үзээд болохгүй бол хүчээр үзэхээр шийдэж, ийнхүү Швейцарт урхинд оруулан баривчилсан байна.
ОХУ –ын олон улсын нэр нөлөө, санхүүгийн боломж чадвар нь Зөвлөлтийн үеийнхээс огцом багассан, АНУ-ынхтай зүйрлэхээргүй сул учраас ийм өвөрмөц “ан”-ийн эсрэг бодитоор хийж чадах зүйл тун бага. Их бодож л тухайн баривчлагдсан улсын Гадаад яаманд өөрийн гадаад яаманд эсэргүүцэл мэдэгддэг. Харин АНУ нь эдийн засаг, цэрэг улс төр гээд л боломжоо ашиглан “хөөрхий” гуравдагч улсад маш хүчтэй дарамт үзүүлснээр дийлэнхдээ Оросын иргэдийг өөрийн нутагтаа албадан хүргүүлж, шийтгэж дөнгөдөг.
Ямар сайндаа л ОХУ нь 2015 оноос хойш Дотоод яам, Холбооны аюулгүй байдлын алба, Мөрдөн байцаах хороо, Батлан хамгаалах яам гэх мэт улсын чухал нууцын талаарх мэдээлэлтэй ажилтнуудаа амрах, зугаалах гэх мэт хувийн зорилгоор хилийн чанад руу явахыг албан ёсоор хориглосон. Явах тохиолдолд удирдлагадаа урьдчилан мэдэгдэж, холбогдох нэгж байгаа яам, албаны дарга нараас тусгай зөвшөөрөл авч байхаар болгосон. Ингээгүй тохиолдолд тэднийг АНУ дуртай үедээ хүсэл гарган баривчлуулах эрсдэлтэй. Жишээлбэл, оросуудын очиж амрах дуртай Туркт Оросын нэг хотын цагдаагийн дарга амрахаар очжээ гэж бодоход АНУ-аас түүнийг Навальныйг дэмжигчдийн жагсаалыг хэрцгийгээр дарж, ардчилал хүний эрхийн эсрэг гэмт хэрэг хийсэн гэж баривчлуулаад Америк руу албадан авч явах эрсдэлтэй болсон юм байна.
Иймд Оросын хүчний байгууллага, яам тамгын газрын том албан тушаалтнууд зөвхөн албаны шугамаар дипломат хамгаалалттайгаар хил давдаг болж.
Афганистанд тун гутамшигтай ялагдал хүлээсэн АНУ-ын эрх баригчид ОХУ, Хятадын нөлөөг өсгөлөө гэж буруутгагдаж байгаа тул энэ мэт “ан” хийж, бага ч гэлээ ялалт байгуулах хүсэл нь бүр огцом өснө гэж зарим шинжээж үзэж байгаа аж. Гэвч АНУ нь энэ бүх зэмлэлийг бүгдийг үгүйсгэдэг бөгөөд ийм хэргүүдэд улс төр эсвэл геополитикийн сэдэлтэй нууц дайн ямар ч хамаагүй, зөвхөн АНУ-ын эрүүгийн хуулийг зөрчсөн эрүүгийн хэрэгтнүүдийг олон улсын хууль журмын дагуу саатуулах хүсэлт гаргадаг гэж тайлбарладаг.
15°C
Сэтгэгдэл (4)