Өвчтөнд зодуулсан сувилагч хоёр сартай бие давхар байжээ

Өнгөрөгч есдүгээр сарын 17-ны өдөр Завхан аймгийн Нэгдсэн эмнэлэгт түргэн тусламжаар хүргэгдэн ирсэн 30 настай эрэгтэй С нь ээлжийн сувилагч эмэгтэйг зодож гэмтээсэн хэрэг гарчээ. Бид уг хэргийг тодруулахаар хохирогчийн ахтай цахимаар холбогдож мэдээлэл авсан юм. Хохирогчийн ахын хэлж буйгаар “ Сэтгэцийн өөрчлөлттэй хэмээн түргэний машинаар хүргэгдэн ирсэн С нь өдрийн 14:00 цагийн орчимд эмнэлэгт ирсэн байдаг. Гэтэл хурц хэлбэрийн сэтгэцийн өөрчлөлттэй ирсэн хүнийг өөрийгөө болон бусдыг гэмтээх эрсдлээс хамгаалах арга хэмжээ авалгүй үлдээсэн нь дүүгийн минь биед халдах нөхцлийг бүрдүүлсэн. Бид ажлын байранд үйлдэгдсэн уг хэргийг хуулийн хүрээнд шийдэгдэхийг хүлээж байгаа ч эмнэлгийн зүгээс ажилтнаа анхаарч үзэх хэрэгтэй байгаа” тухай манай сайтаар дамжуулан хэлж байгаа юм. Хохирогч эмэгтэйн биеийн байдал муу гурван шүд хугарсан, тархиндаа бэртэж хэвтэн эмчлүүлж байгаа гэдгийг түүний ах хэлж байгаа юм. Уг асуудалд эмнэлгийн дарга Б.Цогзолмаа өөрийн байр сууриа илэрхийлсэн юм.