Йокозуно Хакухо зодог тайлахаар шийдсэн тухай japantimes.co.jp сайт мэдээлж байна. Тус сайтын эх сурвалжийн мэдээлснээр 36 настай Йокозуна баруун өвдөгний бэртэл нь эдгэхгүй байгаагаас хэд хэдэн тэмцээнийг алгасаад байсан тул зодог тайлж магадгүй тухай яригдаж байсан нь ийнхүү биеллээ олсон аж. Хакухо нь бэртэл болон COVID-19-ийн халдвар авсны улмаас зургаан тэмцээнийг алгасаж байгаад, долоодугаар сард Нагояд болсон тэмцээнд 15-0 гэсэн шинэ амжилтаар ялалт байгуулаад байсан ч бэртэл нь ахин сэдэрсэн тул есдүгээр сарын тэмцээнийг ахин алгассан юм.
Хакухо нь 2001 оны хавар сумогийн дэвжээнд анх гарч байсан бол 2006 оны тавдугаар сарын тэмцээнд анх түрүүлж байсан юм. Улмаар 2007 оны долоодугаар сар, 22 настайдаа Нагоя башёд түрүүлэн Йокозуна цол авч байв. Хакухо нь сумо бөхийн дэвжээн дээр нийт 1187, макучи зиндаанд 1093 ялалт байгуулж, эзэн хааны цомыг 45 удаа авч байсан гэдгээрээ сумо бөхийн түүхэн дэх хамгийн агуу дээд амжилтын эзэн болсон юм.
Сэтгэгдэл (0)
Сэтгэгдэл бичигдээгүй байна