Их Британи улс Европын холбооноос гарсны дараа ажлын хүчний асар их хомсдолтой тулгарч, үүнээс болоод дэлгүүрүүд нь бараагаа татаж чадахгүй, ШТС-уудад бензинээр хангаж чадахгүйд хүрчээ. Иймд дэлгүүрүүдийн ачаалал дээд цэгтээ хүрдэг Зул сарын баяраар орон даяараа мацаг барихгүйн тулд 10500 гадаадын ажилчдад ажлын виз олгохоор шийдсэн тухай “deutsche wellee” мэдээлсэн байна.
Эдгээр ажилчдаас ачааны машины жолооч 5000, мах боловсруулах үйлдвэрийн ажилчин 5500 байх аж. Ажлын виз шинээр авсан эдгээр гадаадын иргэд Их Британид арванхоёрдугаар сарын 24-н хүртэл ажиллаж, Зул сарын баяраар дэлгүүрүүдийг бараа таваараа хангахад туслах ёстой юм байна.
Тээврийн жолооч нарын “Road Haulage Association” үйлдвэрчний эвлэлээс гаргасан мэдээгээр Их Британид хүнд даацын машин барих 100 мянга гаруй жолооч дутагдаад байгаа аж.
Их Британийг Европын холбооноос гарсны дараанаас тэнд ажиллаж байсан Европын холбооны иргэд ажиллах зөвшөөрөл, виз, нийгмийн даатгал гэх мэт асуудлын улмаас нутаг буцацгаасан, түүнчлэн цар тахлын улмаас жолооны курсууд урт хугацаагаар завсарласан гэсэн хоёр үндсэн шалтгааны улмаас Нэгдсэн вант улс ийнхүү тээврийн жолооч нарын хомсдолтой тулгарлаа гэж “The Financial Times” бичсэн байна.
Жолооч нарын дутагдлыг нөхөхийн тулд Их Британи нь гадаадын ажилчдад ажлын виз олгохоос гадна тэтгэвэртээ гарсан тээврийн жолооч нарт хандаж, ажилдаа буцаж орохыг уриалсан захидал явуулж байгаа аж. Тус захидалд хүнд үед ажилдаа түр хугацаагаар эргэж орсон тээврийн жолооч нарт уян хатын ажлын цаг, боломжийн цалин зэрэг олон давуу нөхцөл амласан аж.
Мөн С ангиллын 3000 жолооч яаралтай сургаж бэлдэхэд зориулж, Боловсролын яаманд 11,7 сая еврогийн дэмжлэг үзүүлэхээр болжээ.
Сэтгэгдэл (0)
Сэтгэгдэл бичигдээгүй байна