УИХ-аас дэмжсэн Хөрөнгө оруулалтын тухай хуульд өөрчлөлт оруулах төслийн талаар гишүүдийн байр суурийг тодрууллаа.
УИХ-ын гишүүн Ц.Даваасүрэн "Анхааралт татсан нэг асуудал байгаа юм.50 мянган ам.доллартай тэнцэх хэмжээний эд хөрөнгө монголд эзэмшиж байвал тэр хүний оршин суух асуудлыг шийдэх гээд байгаа юм. Хөрөнгө оруулалтын хууль атлаа оршин суух асуудлыг нь хөндөөд байж болохгүй биз дээ. Хүний илүүдэлтэй орон хажууханд байна. Энгийнхээр ойлгоход манай улсад нэг байр худалдан авахад бүгд оршин суугчид болно. 10 жилийн дараа иргэний пасспорт аваад явна. Гурван сая хүн амтай манай улс энэ бүгдийг шингээж чадах уу. Байр авчихсан байгаа хэдэн хүн оршин суугч болох юм байна. Ийм л заалт байгаа. Бүлгээр ороогүй. Гишүүд энэ хуулийн талаар ойлголтгүй байсан юм билээ" гэв.
Уг хуулийн төслийг Улсын Их Хурлын гишүүн Х.Булгантуяа, Х.Ганхуяг, Д.Өнөрболор, П.Анужин нарын гишүүд 2021 оны зургадугаар сарын 21-ний өдөр өргөн мэдүүлсэн Хөрөнгө оруулалтын тухай хуульд өөрчлөлт оруулах тухай хуулийн төсөл болон хамт өргөн мэдүүлсэн Хуулийн этгээдийн улсын бүртгэлийн тухай хуульд өөрчлөлт оруулах тухай хуулийн төслийн хэлэлцэхийг нь УИХ-аас дэмжсэн.Тус хуулийн төсөлд одоо үйлчилж байгаа хууль эрх зүйн тогтолцооны хүрээнд гадаадын хөрөнгө оруулалтын доод хэмжээг зохицуулсан шаардлага тусгагдсан байдаг. Гадаадын компани Монгол Улсад бизнес эхлэхийн тулд “Гадаадын хөрөнгө оруулалттай аж ахуйн нэгж” эсвэл “Төлөөлөгчийн газар” гэсэн статусын аль нэгийг сонгох хэрэгтэй болдог. Мөн гадаадын хөрөнгө оруулалттай аж ахуйн нэгжийн 25-аас доошгүй хувийг гадаадын компани эзэмшсэн байх ба 100 мянган ам.доллараас доошгүй хөрөнгө оруулалт хийсэн байх ёстой. Энэхүү хөрөнгийн босго нь гадаадын хөрөнгө оруулалттай аж ахуйн нэгж байгуулахад шаардлагагүй бөгөөд харин тухайн хөрөнгө оруулагч болон түүний гэр бүл нь Монгол Улсад байнга оршин суух виз хүсэх тохиолдолд Монгол Улсад оруулах хөрөнгө оруулалтын доод хэмжээг зааж өгөх нь тохиромжтой гэж төсөл санаачлагчид үзжээ. Гэвч хууль санаачлагчдын зарим нь уг хуулийн төслийн заалтын талаар мэдээгүй гарын үсгээ зурсан гэх тайлбарыг ч хэлж буй. Нөгөөтэйгүүр УИХ-ын гишүүд уг хуулийн төслийг дэмжихгүйгээ илэрхийлж, үндэсний аюулгүй байдалд нөлөөлж болзошгүй хор уршигтай гэдгийг хэлж байгаа юм.
Сэтгэгдэл (0)
Сэтгэгдэл бичигдээгүй байна