Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төслийг хэлэлцэхийг Хууль зүйн байнгын хорооны хуралдаанаар дэмжлээ.
Төсөл санаачлагчийн илтгэлтэй холбогдуулан УИХ-ын гишүүд асуулт асууж, Б.Энхбаяр, Б.Пүрэвдорж нарын гишүүдээс хариулт, тайлбар авсан юм. УИХ-ын гишүүн Н.Учрал, Н.Алтанхуяг нь анхан шатны шүүхээс хэргийг буцаах зохицуулалтыг үлдээх нь зүйтэй гэдэг байр суурийг илэрхийлж, холбогдох үндэслэл, тайлбарыг хэлж байлаа. Хэрэг буцааж болохгүй гэдэг хуулийн зохицуулалт дор хэргийг нягтлахгүйгээр, шүүх заавал шийдвэр гаргах шахалтад орох эрсдэлтэй гэдэг байр суурийг илэрхийлж байв. Түүнчлэн шүүхээс өмнөх мөрдөн байцаах, прокурорын шатны үйл ажиллагааг сайжруулахгүйгээр, шууд шүүх эцсийн шийдвэрийг гаргаж байхыг хуульчлах нь эрсдэлтэй гэв.
УИХ-ын гишүүн Ш.Раднаасэд: "Энэ хууль давуу тал ч ихтэй, сөрөг тал ч ихтэй. Заавал ял өг, эсвэл цагаатга гэсэн том зарчим оруулж ирлээ. Дутуу мөрдөөд ял завшуул эсвэл дутуу мөрдөөд ялтан болго. Ийм л зарчим яваад байх шиг байна. Энэ хуулийн төслийг чуулганаар хэлэлцэх үеэр Улсын дээд шүүх, прокурорын байгууллагаас хүмүүс байлцуул. Бидэн дунд хэрэг мөрдөж, хянаж, шүүж байсан нэг ч хүн алга. Тэр зовлонг нь мэдэхгүй. Гэмт хэргийн шинжгүй хэрэг хэрэгсэхгүй болчихвол яах вэ. Заавал дахин хэрэг бүртгэл дээр дахин шалгагдах гээд байна. Энэ зөв үү. Прокурор шүүхийн шатанд өөрөө оролцож хэрэг мөрдөх гээд байна. Энэ чинь зөв үү. Хяналт тавих ёстой атал мөрдөлтөд оролцох гээд байна.
Эрүүдэн шүүвэл яах уу. Тэр хохирлыг шүүхийн шатанд яаж зөвтгөх юм бэ. Шүүх хурал дээр хохирогч эсвэл гэрч мэдүүлэгээсээ татгалзвал яах уу. Шүүх буцаах ямар ч боломж байхгүй. Заавал яллана эсвэл цагаатгаад явуулна. Энэ дотроо авах нэг зүйл нь прокурор хэрэг татдаг байдлыг өөрчлөх нь зөв л байх. Тэр тусмаа олны анхаарал татсан хэргүүд шүүх рүү шилжихгүй байх вий дээ. Мөрдөн байцаалтын шатанд хэрэг замхраад алга болдог болох вий дээ гэж харагдаж байна. Дээд шүүх болон прокурорын байгууллагаас өгсөн санал амьдралтай саналууд байна шүү. Бусад улс орны туршлага хэрэггүй. Өөрсдийнхөө зовлон дээр суурилж хуулийн төсөл бичих болохоос биш тэр улсад ийм гоё гэж шүүхийн хуулийг яримааргүй байна" гэлээ.
Сэтгэгдэл (0)
Сэтгэгдэл бичигдээгүй байна