Засгийн газрын өнөөдрийн хуралдаанд Засгийн газрын хуульд оруулах нэмэлт, өөрчлөлтийн хуулийн төслийг танилцуулахаар төлөвлөж байсан боловч хойшлуулсан байна. Тодруулбал, сайд нар тус хуулийн төсөлд байр сууриа нэгтгээгүй, дутуу зүйл их байна гэж үзсэн учир Ерөнхий сайд хойшлуулжээ.
Засгийн газрын тухай шинэ хуулийн төсөлд Эдийн засгийн хөгжлийн яам, Цахим яам гэсэн хоёр яам байгуулахаар тусгасан. Ерөнхий сайд Л.Оюун-Эрдэнэ тус хоёр яамыг байгуулахад эхлээд маш сайн бэлтгэл ажлыг хангах шаардлагатай. Яарч сайд, дарга томилох, байр бариулах зэрэг асуудал чухал биш гэдгийг анхааруулжээ.
Ирэх оны төсөвт Эдийн засгийн хөгжлийн яам, Цахим яам байгуулах зардлыг суулгасан байна. Эдийн засгийн хөгжлийн сайдын багцад 4.39 тэрбум, Цахим хөгжил, харилцаа холбооны сайдын багцад 1.86 тэрбум төгрөг тус тус төсөвлөжээ.
Ерөнхий сайд Л.Оюун-Эрдэнэ томилогдох үедээ Засгийн газрын бүтэц, бүрэлдэхүүнд өөрчлөлт оруулж Эдийн засгийн хөгжлийн яам болон Цахим хөгжлийн яам байгуулна гэж мэдэгдсний дагуу ийн Засгийн газрын тухай хуулийн төслийг тун удахгүй УИХ-д өргөн барихаар зэхэж байна.
Сэтгэгдэл (0)
Сэтгэгдэл бичигдээгүй байна