Завхан аймгийн Тосонцэнгэл сумын Засаг дарга болон тус сумын ИТХ-ын дарга нь огцорсон талаар УИХ-ын гишүүн Б.Баярсайханаас тодрууллаа. Тосонцэнгэл сумыг сүүлийн 10 гаруй жил АН дангаараа удирдаж ирсэн бөгөөд өнгөрсөн сонгуулийн үр дүнгээр "өнгө" нь солигдсон юм.
УИХ-ын гишүүн Б.Баярсайхан "Одоогоор мэдээлэлгүй байна. Завхан аймгийн Засаг дарга Д.Түвшинжаргалаас утсаар тодруулахад, Тосонцэнгэл сумын Засаг дарга Ж.Жигмэддорж болон ИТХ-ын дарга Б.Даваахүү нар ажлаас чөлөөлөгдөх өргөдлөө өгсөн гэсэн мэдээллийг надад өглөө. Шалтгааныг нь тодорхой мэдсэнгүй. ИТХ-ын хуралдаан нь болсон эсэх талаарх мэдээлэл ч алга. Тэд сонгуулийн дараа томилогдсон. Тосонцэнгэл сумын Засаг дарга Ж.Жигмэддоржийн хувьд ЕБС-ийн багшаар ажиллаж байсан залуухан хүн. ИТХ-ын дарга Б.Даваахүү олон жил орон нутагт ажилласан, туршлагатай.
Тосонцэнгэл 10 гаруй мянган хүн амтай том сум. Энэ орон нутгийг удирдах хүмүүсийн ур чадвар, улстөрийн нөхцөл байдал хоорондын үл ойлголцлын асуудал байгаа байх гэж бодож байна. Улс төржилт Монголд газар авсан. Орон нутагт улстөржилт бүр хүнд. Хоёр намыг дэмждэг хамаатнууд хоорондоо хүртэл золгодоггүй ах, дүү нар бий. Тэр намын гаралтай учраас надад шагнал урамшуулал ирсэнгүй гэж хүртэл ярьдаг. Би өнгөрсөн хугацаанд гурван удаа аймгаа бүтэн тойрсон. Энэ үеэрээ улстөржилтөөс ангид байж талцаж, хуваагдахгүй байхыг уриалж ирсэн" гэлээ.
Сэтгэгдэл (0)
Сэтгэгдэл бичигдээгүй байна