АНУ-аас ирж байгаа зарим мэдээ нь XXI зууны дэлхийг тэргүүлэгч их гүрэн бус харин газраас эхлээд машины зогсоол хүртэл юм болгоноо булаацалдаад маргаанаа буудалцаж шийддэг хууль дүрэмгүй хүмүүсийн бөөгнөрөл гэж санагдахаар байна.
Жишээлбэл, АНУ даяар гарсан галт зэвсэг хэрэглэсэн гэмт хэргийн талаарх мэдээллийг цуглуулдаг “Gun Violence Archive” сайт дээрх мэдээнээс үзвэл өнгөрсөн амралтын хоёр өдөр Америкийн баар цэнгээний газруудад болсон буудалцаанаас болж 11 хүн амиа алджээ.
Теннеси мужид 32 настай эрэгтэйг маргааны үеэр буудаж хөнөөсөн. Техаст бааранд болсон маргааны үеэр буудалцаан болж даруй дөрвөн хүн шархдаж, нэг нь шархаа даалгүй амиа алдсан. Умард Каролинад бямба гарагт цэнгээний газар болсон маргааны үеэр нэг хүн буудуулан амиа алдаж, өөр нэг хүн шархадсан. Ахиад л Техаст шерифийн туслах гурван хүн дээрмийн хэргийг таслан зогсоох гэж байгаад спорт баарны хажууд отолтод орсон. Гэмт этгээдүүд шерифийн туслах нэг эрийн аминд хүрч, нөгөө хоёрыг нь хүнд шархдуулсан.
Үүнээс гадна хүмүүсийг машинд нь байхад буудсан эсвэл хүмүүсийн хажуугаар зөрж гарсан машинаас гал нээсэн хэрэг өнгөрсөн долоо хоногт олон гарчээ. Тодруулбал, эдгээр нөхцөлд 19 хүн галт зэвсгийн шарх авч, гурав нь суманд оногдон өөд болсон. Чикагод машинаар явж байсан 17, 19 настай охид буудуулсан. Манхэттений нэг дүүрэгт гудамжинд байсан өсвөр насны хүүхдүүд рүү гал нээсэн, сум 16 настай хүүгийн нүүрэд туссан. Иллинойс мужид гудамжны сандал дээр сууж байсан залуус руу хажуугаар нь өнгөрсөн машинаас гал нээсэн. Вашингтоны төвд баасан гарагийн орой эрэгтэй, эмэгтэй хоёр руу гал нээсэн. Чикагод баасан гарагт 21настай жолооч сумны шарх авсан.
Мөн дэлгүүрийн хажуудах машины зогсоол эсвэл ШТГ-ээлжээ булаацалдсаны улмаас олон буудалцаан гарчээ. Умард Каролинад ШТГ дээр ээлжээ булаацалдан буудалцахад 37 настай эрэгтэй буудуулж амиа алдсан. Нью-Мехико мужийн Альбукеркед зогсоол дээрх байр булаацалдсан маргааны үеэр нэг жолооч нөгөөгөө буудаж хөнөөсөн. Өмнөд Каролинад зогсоол дээр гарсан маргааны үеэр нэг жолооч нөгөөхөө буудсан. Охайо мужид өсвөр насны хүүхдүүдийн дунд болсон маргааны үеэр нэг нь буу гаргаж 14 настай охины цээж рүү буудсан.
Ийм мэдээ уншихаар хэн ч гээд асуудал бүрийг хурдан буугаар шийддэг байсан гэх Зэрлэг баруун төсөөлөгдөх нь мэдээж. “The Good, the Bad and the Ugly” эсвэл Чарльз Бронсоны кино шууд санаанд орно. Гэвч нөгөө талаас 331, 45сая хүнд 393,3 сая галт зэвсэг ногдож байгаа болохоор аргагүй гэж санагдмаар. Харин судлаачдын бодлоор галт зэвсэг хэрэглэсэн гэмт хэргийн тоо АНУ-д ингэж өсөж байгаа нь нийгэм хэр их бухимдалтай, нервтэй байгааг харуулж байгаа хэрэг аж. АНУ-д юмны үнэ сүүлийн 13 жилд байгаагүй өндөр хурдацтайгаар өсөж байгаа тухай “Америкийн дуу хоолой” мэдээлсэн. Дээр нь 280 сая машинтай, өөрөөр хэлбэл хоёр хүний нэг нь машин унадаг улсад бензиний үнэ сүүлийн долоон жилийн дээд хэмжээнд хүрч үнэд орсон.
Энэ бүхний дээр “Covid”. АНУ –д Covid-19-ийн улмаас болж нас барсан хүний тоо 676 мянгад хүрсэн нь Дэлхий нэг ба хоёрдугаар дайн, Вьетнамын дайнд АНУ-ын амссан нийт хохирлоос давж гараад байна. Дээр нь бас Бүгд найрамдах ба Ардчилсан нам хоорондын ширүүн тэмцэл. Ардчилсан нам экс Ерөнхийлөгч Трамп ба түүнийг дэмжигчдийг буулгаж авахаар зүйл бүрээр хавчиж, шүүхдэж байгаа нь нийгмийн бухимдлыг намжаахад сайнаар нөлөөлөхгүй байгаа нь мэдээж. Энэ бүхний дээр BLM хөдөлгөөн гэж бас байна.
Энэ бүхэн нийлээд нийгэмд асар их бухимдал үүсгэж, бухимдал нь нийгэмд маш улс төрийн үзэл бодол, арьсны өнгө, орлогын хэмжээнээс үүдсэн хагарал үүсгэж, хагарал нь буудалцаанаар илэрч байгаа хэрэг аж.
Энэ сарын 9-нд АНУ 24 хүн бууны суманд оногдож амиа алдсан бол 10-нд даруй 58 хүн буудуулж нас барсан, 166 хүн шархадсан. Залгуулаад 11-нд Америк даяар Колумбын өдрийг тэмдэглэсэн амралтын өдөр байсан бөгөөд тэр долоо хоногийн болон бямба, ням гарагт болсон буудалцааны үеэр, өөрөөр хэлбэл амралтын гурван өдөр болсон иргэд хоорондын буудалцааны үеэр 109 хүн амиа алдаж, 305 хүн шархадсан нь рекорд “амжилт” болсон.
Албан ёсны статистик мэдээгээр АНУ-д 1-7 дугаар сарын хооронд 23 мянган хүн буудалцааны үеэр амиа алдсан байна. Үүн дээр дараагийн гурван сарын статистикийг нэмбэл бүр ч их тоо гарна.
-2°C
Сэтгэгдэл (4)