Цар тахалтай байгаа учраас энэ хичээлийн шинэ жил 2-3 настнууд цэцэрлэгт хамрагдаагүй. Тэгвэл ирэх сараас 2-3 настай хүүхдийг цэцэрлэгт хамруулахаар судалж байгаа гэдгийг Боловсрол, шинжлэх ухааны сайд Л.Энх-Амгалангаас тодрууллаа.
Тэрбээр "Энэ жил халдварын нөхцөл байдлаас шалтгаалж 4-5 настай хүүхдүүдийг цэцэрлэгт авсан. Есдүгээр сарын 1-нээс хичээл эхэлснээс хойш нийт халдвар авч байгаа иргэдийн дунд хүүхдийн халдварын тоо өсөөгүй. Анх есдүгээр сарын 1-нд халдвар авсан нийт иргэдийн 20 хувь нь хүүхдүүд байсан бол одоо 18 хувь нь хүүхдүүд байна.
Нэгт, хүүхдүүд халдварлах нь багасаж байна. Хоёрт, 0-11 насны хүүхдүүдийг томуугийн вакцинд хамруулж байна. Үндсэндээ 2, 3 настай нийт хүүхдийн 90 орчим хувь нь томуугийн вакцинд хамрагдаад байна. Тиймээс эрсдлийн үнэлгээ хийж, эрсдэлгүй гэдэг тооцоолол гарах юм бол арваннэгдүгээр сарын 1-нээс 2, 3 настай хүүхдүүдийг цэцэрлэгт авах ажлыг орон даяар зохион байгуулна" гэсэн мэдээллийг өглөө.
Улсын хэмжээнд нийтдээ цэцэрлэгт хамрагдах 42 мянга орчим хоёр настан бий.
Сэтгэгдэл (0)
Сэтгэгдэл бичигдээгүй байна