Н.Алтанхуяг: МАН сонгууль луйвардаж бор халзан хонь байсан ч сонгогдож байна

Улсын Их Хурлын зарим гишүүний бүрэн эрхийг хүлээн зөвшөөрөх тухай асуудлыг хэлэлцлээ. Хэлэлцэж буй асуудалтай холбогдуулан УИХ-ын гишүүд үг хэллээ. 

УИХ-ын гишүүн Н.Алтанхуяг:

-Сонгуулийнхаа хуулийг өөрчлөх замаар засгийнхаа эрхийг авдаг болсон. Хэрэв шударга сонгууль болдог байсан бол өнөөдөр ард түмний амьжиргаа ийм доогуур байхгүй байх байсан. Дэвшсэн хүмүүсийг нь буруутгахгүй. Бор халзан хонь байсан ч гарч байгаа. Та нар одоо ард түмнийхээ төлөө ажлаа хий л дээ. Тоогоо нэмэгдүүлж, эрх мэдлээ нэмэгдүүлэхээс өөр юу хийж байгаа юм бэ. Сонгуулийн хууль нь өөрөө мөнгөний сонгууль болж хувирсан. Мөнгө, тогтолцоо, сүлжээ гурав Монголд хэрээс хэтэрлээ. Би та нарт зөндөө хэлж байгаа. Ингэж явсаар Монгол Улс хямарна шүү. Энэ уншиж байгаа СЕХ-ны нөхөр хүртэл өөрөө асуудалтай шүү. Нэг намын дарангуйлал тогтсон гэдэг нь эндээс шууд харагдаж байна. Олон хавар нэгэндээ шүү. Та нар хэтэрхий бярдаж, хүчээр асуудалд хандаж байна. Харамсалтай нь ард түмнийг бодохгүй байна. Үлдсэн хоёр суудлыг нь хүртэл луйвардаж авлаа. Худлаа юм уу, мөнгө тараасан нь. Хүмүүсийн тоо нь хэрээс хэтэрч, ажил хэрэгч байдал огт байхгүй.

СЕХ-ны  дарга П.Дэлгэрнаран:

–Санал хураалтын ажил хуулийн дагуу явагдсан. Сонгуулийн санал хураалтын явцад хэрэг зөрчлийг цаг тухайд нь цагдаагийн байгууллага шийдвэрлээд явсан.

УИХ-ын гишүүн Д.Ганбат:

-Сонгууль нэртэй ард түмний мөнгийг үрж, бухимдуулсан явдал болсон. Энэ хоёр залуу энд сууж байгаа нь үнэхээр ичгэвтэр байна. Би энэ хоёрын оронд байсан бол ичээд энд суухгүй.