УИХ-ын чуулганы хуралдаан үргэлжилж байна. Хуралдаанаар УИХ-ын гишүүн О.Цогтгэрэл УИХ дахь АН бүлэгт болж үйл явцын талаар мэдээлэл өглөө.
О.Цогтгэрэл : Өнөөдөр хэлэлцэх асуудлын дараалалд оруулах горимын саналыг өчигдөр 15 цагийн үед УИХ-д даргад бичгээр өгснийг нэг цагаар хоцорч ирсэн гэх юм. Өнгөрөгч Даваа гаригт АН-ын блэг хуралдаж, хуралд оролцсон долоон гишүүн долуулаа бүлгийн даргаас Д.Ганбатыг чөлөөлж, оронд нь Н.Ганибал гишүүнийг бүлгийн даргаар 100 хувь сонгосон. Энэ тогтоолыг та чуулганы нэгдсэн хуралдаан дээр танилцуулах ёстой. АН-ын бүлэг хэвийн үйл ажиллагаа явуулах боломжийг УИХ-ын дарга та хангах ёстой гэв.
Үүнд УИХ-ын дарга Г.Занданшатар хариулт өглөө. Тэрбээр "Хуулиа уншиж, УИХ-ын үйл ажиллагаанд хүндэтгэлтэй оролцмоор байна. Намын дотоод асуудлаа бүлэг дотроо шийд. Үүнийг УИХ-ын дарга зарлан мэдээлэх хууль зүйн үндэслэл байхгүй, хуульд харшилна. Яагаад гэвэл АН-ыг бүлэг хуульд заасны дагуу байгуулагдаж, үйл ажиллагаа явуулж байгаа. 2020 оны сонгуулийн үр дүнд АН-аас 11 хүн сонгогдож, бүлэг байгуулсан тухай шийдвэр болон бүлгийн гишүүдийн нэрсийг бичгээр ирүүлснийг 2020 оны долдугаар сарын 1-ны өдөр УИХ-д танилцуулснаар АН-ын бүлэг 11 гишүүнтэй байгуулагдсан. Үүнээс өөрөөр УИХ-ын дарга зарлан мэдээлэх дэг байхгүй. Бүлгийн дотоод асуудал. Д.Ганбатаас УИХ-ын гишүүн Ц.Туваан, Н.Ганибал, Ж.Батсуурь нарын гишүүдийг намын гишүүнээс хасах тухай сахилгын хариуцлага оногдуулсан тул мөн УИХ-ын гишүүн С.Ганбаатар, Н.Алтанхуяг нар манай намаас нэр дэвшиж албан ёсоор сонгогдоогүй тул эдгээр гишүүд нь АН-ын болон бүлгийн гишүүн байх боломжгүй талаар мэдэгдсэн албан бичиг ирүүлсэн. Үүнийг бид УИХ-ын бүтцийн байгууллага гэж авч хэлэлцээгүй.
Д.Ганбатаас гишүүнээс таван ч бичиг ирсэн. Бүлгээс гишүүд хасагдсан тухай, бүлгийн үйл ажиллагааны талаар, мөн бүлгийн үйл ажиллагаа хэвийн явагдаж байгаа гэх мэт бичгүүд ирсэн. Б.Бесейн гишүүн мөн бичиг ирүүлсэн. АН-ын нэр бүхий гишүүдээс бие биеэ үгүйсгэсэн, хоорондоо зөрчилдсөн, хуульд заасан шаардлага хангаагүй бичгүүдийг ар араасаа өдөрт хэд хэдэн удаа ирүүлж байгаа нь УИХ-ын үйл ажиллагаанд хүндрэл, ойлгомжгүй байдлыг үүсгэж байна. АН-ын бүлэг 11 гишүүнтэй үйл ажиллагаа явуулж байгаа нь бодит байдалд үнэн байна. Бүлгийн бүтэц, бүрэлдэхүүнд хуулийн дагуу орсон өөрчлөлтийг УИХ-д зарлан мэдээлэхэд ойлгомжгүй байдлыг АН-ын бүлэг өөрөө үүсгэж байна. УИХ болон УИХ-ын Тамгын газар шүүх биш учраас ялгаж, салга. Тамга, тэмдэг хөөцөлддөг байгууллага биш. АН-ын бүлэг дотоод дүрэм, журмынхаа хүрээнд асуудлаа шийдвэрлэн УИХ-д хүндэтгэлтэй хандаж УИХ руу үсчихгүй байхыг тэрбээр хүслээ.
Сэтгэгдэл (0)
Сэтгэгдэл бичигдээгүй байна