Америкийн мэс засалч нар генийн өөрчлөлттэй гахайн бөөрийг хүнд шилжүүлэн суулгах хагалгааг амжилттай хийсэн тухай “Reuters” агентлаг мэдээлсэн байна.
Нью-Йоркийн их сургуулийн дэргэдэх Лангон эрүүл мэндийн төвийн эмч нарын хийсэн хагалгаа амжилттай болж, шилжүүлэн суулгасан гахайн бөөр гурав хоноход гологдолгүй хэвийн ажиллаж байжээ. Эмч нарын ярьснаар бөөрийг суулгамагц анхнаасаа хэвийн ажиллаж, шээс ялгаруулан цусыг креатенин болон бусад хорт бодисоос цэвэрлэж эхэлсэн аж. Улмаар хүний цусан дах креатинин нь хэвийн хэмжээнд хүрсэн байна.
Ингэж гологдохгүй байхад эзэн амьтны бие урьдчилан хийсэн генийн өөрчлөлт голлох үүрэг гүйцэтгэсэн гэдгийг эмч нар онцолжээ. Гахайн генийг өөрчилсөн учраас донор эрхтнийг гологдоход хүргэдэг эд бөөрөнд үгүй болсон байна.
Энэхүү бөөр шилжүүлэх хагалгааг тархины үхжилд орж, хиймэл амьсгалын аппаратад холбогдоод байсан хүнд хийсэн гэдгийг “Reuters” агентлаг онцолж. Хагалгааг хийсэн эмч Роберт Монтгомерийн ярьж байгаагаар цаашид хоёр гурван жилийн дотор үүнтэй адил туршилтын хагалгааг хэд хэдэн хүн дээр дахин хийх төлөвлөгөөтэй байгаа гэжээ. Цаашдаа эдгээр хагалгаа амжилттай болохтой зэрэгцээд эрдэмтэд хүний биед шилжүүлэн суулгасны дараа гологдохгүй бөөр бүхий гахайг тогтвортой үржүүлж чадвал олон мянган хүний амийг аврах боломж гарна гэж “Reuters” үзсэн байна.
Зөвхөн АНУ-д гэхэд л бөөр шилжүүлэн суулгах хагалгааны ээлжээ хүлээн дугаарлаж байгаа 90 мянган хүн байдаг юм байна. Ээлжээ хүлээх дундаж хугацаа нь 3-5 жил хүртэл байдаг аж.
-6°C
Сэтгэгдэл (3)