Эрүүл мэндийн яамны өнөөдрийн хуралдаанаар холбогдох албаныхан коронавирусийн халдварын нөхцөл байдал, авч хэрэгжүүлж байгаа арга хэмжээний талаар мэдээлэл өгсөн юм. Хэдийгээр иргэдийг дархлаажуулалтдаа идэвхтэй хамрагдахыг уриалж байгаа ч дархлаажуулалтын хамрагдалт муу байна гэдгийг Эмнэлзүйн зөвлөх багийн гишүүн, Улсын Гуравдугаар төв эмнэлгийн захирал Ц.Төмөр-Очир онцоллоо.
Тэрбээр "Өнгөрсөн хугацаанд манай эмнэлэг 1800 гаруй халдвартай иргэдэд эмнэлгийн тусламж, үйлчилгээ үзүүлсэн. Нийт хэвтэн эмчлүүлж буй хүмүүсийн 18-20 хувь нь нэн хүнд өвчтөн байна.
Нөхцөл байдал хүнд хэвээр, нас баралт төдийлөн буурахгүй байна. Үүний нэг шалтгаан нь архаг, суурь өвчтэй хүмүүсийн дархлаажуулалтад хамрагдалт нь хангалтгүй, мөн иргэд олон нийтийн газраар явж халдвар хамгааллын дэглэмээ сайтар баримтлахгүй байгаатай холбоотой юм.Иргэд халдвар хамгааллын дэглэмээ мөрдөхгүй байгаа нь ажиглагдаж байна. Эрүүл мэндийн байгууллагад нэг хүн оношилгоо шинжилгээнд хамрагдахад 4-5 хүн дагах, орон нутгаас ирээд үзүүлж буй хүнийг 10-20 хүн дагах асуудал өдөр тутамд эмнэлгийн үйл ажиллагаанд хүндрэл учруулж байгаа. Эмнэлэг бол эрүүл мэндийн байгууллага,халдвар тархах хамгийн эрсдэл өндөртэй орчин. Иймээс эрүүл мэндийн байгууллагаар үйлчлүүлэхдээ аль болох цөөхүүлээ, нэн шаардлагатай хүнээ 1-2 хүн дагаж явах, хэвтэн эмчлүүлж буй хүмүүстээ онцгой анхаарч гурав дахь тунд хамруулах, ялангуяа архаг суурь өвчтэй, 65-аас дээш насны, эрсдэл өндөртэй хүмүүс гурав дахь тунд зайлшгүй хамрагдах шаардлагатай байгааг" тэрбээр уриаллаа.
Сэтгэгдэл (0)
Сэтгэгдэл бичигдээгүй байна