УИХ-ын нэгдсэн чуулганаар төрөөс мөнгөний бодлогын талаар 2022 онд баримтлах үндсэн чиглэлийн төслийн анхны хэлэлцүүлгийг хийлээ. Ирэх жилд баримтлах мөнгөний бодлогын үндсэн чиглэл нь нийгмийн эрүүл мэндийн хямрал бүрэн илааршаагүй, эдийн засаг, санхүүгийн хүндрэлээс сэргэж буй үед боловсруулагдаж байна. Иймд эдийн засгийн сэргэлтийг дэмжих, дунд хугацааны тогтвортой байдлыг хангах, түүнтэй уялдуулсан бүтцийн өөрчлөлтийн бодлогыг төрийн эрх бүхий байгууллагуудтай хамтран хэрэгжүүлэх зорилтуудыг дэвшүүлж байна.
Эдийн засгийн өсөлт: Монгол Улсын Засгийн газар, Төв банкнаас цар тахлын сөрөг нөлөөг бууруулах, эдийн засгийн сэргэлтийг дэмжих зорилгоор багц бодлого, зохицуулалтын арга хэмжээг авч хэрэгжүүлсэн нь ирэх жилийн эдийн засгийн өсөлтийг дэмжинэ. Ирэх онд эдийн засаг 5.9 хувиар өсөхөд уул уурхайн бус салбарын сэргэлт голлох нөлөөг үзүүлнэ. Түүнчлэн гадаадын шууд хөрөнгө оруулалт, экспортын орлого дотоод эрэлтийг дэмжинэ.
Инфляц: Эдийн засгийн сэргэлт, гадаад, дотоод нийлүүлэлтийн хүчин зүйлс инфляцад нөлөөлж байгаа хэдий ч ирэх онд Төв банкны зорилтын орчимд тогтворжих хүлээлт хэвээр байна. Ирэх оны 4 дүгээр улирлын дундаж инфляц 6.9 хувь байх хүлээлттэй байгаа бөгөөд цаашид инфляцыг 6%-ийн голчтой +/-2 хувийн интервалтай түвшинд тогтворжуулах дунд хугацааг харсан мөнгөний бодлогыг үргэлжлүүлэн хэрэгжүүлнэ.
Хэлэлцүүлгийн үеэр УИХ-ын гишүүд асуулт асууж, хариулт авав.
-УИХ-ын гишүүн Б.Энхбаяр:
Хөгжлийн банкны нэг газрын захирал нь таны хүү гээд байсан. Энэ үнэн үү. Хэрвээ үнэн бол ёстой болохгүй асуудал ш дээ. Ашиг сонирхлын зөрчилтэй холбогдоно. Хөгжлийн банкинд шалтгалт хийж, тайлагнадаг газар чинь Монголбанк. Хөгжлийн банк дампуурсан шалтгааныг тантай холбож харах сонирхлын зөрчил болж хувирна.
-Монголбанкны Ерөнхийлөгч Б.Лхагвасүрэн:
Манай хүү Б.Тэмүүжин Хөгжлийн банкийг анх байгуулагдсан цагаас мэргэжилтнээс ажиллаж байгаад сая шинээр томилогдсон удирдлагын багт нэг газрыг нь төлөөлөхөөр томилогдсон байна лээ. Монголбанк бол Хөгжлийн банкны дотоод үйл ажиллагаанд оролцдоггүй. Хяналт, шалгалт явуулж байгаа банкны гаргаж байгаа шийдвэрт нь нөлөөлдөггүй.
19°C
Сэтгэгдэл (15)