Х.Нямбаатар: 'Рио Тинто'-гийн тавьсан манай зээлийн 70 хувийг тэглэх саналыг хүлээж авахгүй

Рио-Тинто группээс Монгол Улсын Засгийн газарт дөрвөн асуудлаар зөвшилцөх саналыг хүргүүлжээ. Тодруулбал, Засгийн газрын эзэмшиж буй 34 хувийн хувьцаанд ногдох 2.3 тэрбум ам.долларын зээлийн 70 хувь буюу 1.6 тэрбум ам.долларыг тэглэх санал тавьжээ. 

Энэ талаар Оюутолгойн Хөрөнгө оруулалтын гэрээг сайжруулах ажлын хэсгийг ахлан ажиллаж буй  ХЗДХ-ийн сайд Х.Нямбаатараас тодрууллаа. Тэрбээр "Өчигдөр "Рио Тинто" группээс дөрвөн асуудал бүхий саналыг Монгол Улсын Засгийн газарт ирүүлсэн.

Нэгд, Монгол Улсад ирээдүйд 22 тэрбум төгрөгийн өр үүснэ гэдэг санхүүгийн тооцоолол хийсэн. Энэ нь манай Засгийн газрын 34 хувьд бичигдсэн 1.4 тэрбум ам.долларын өртөг бүхий өрийн бичилт хийгдсэн. Энэ өрийн бичилт нь 2009 оноос хойш өнөөдрийг хүртэл хугацаанд буюу 12 жилд хүү, нийлмэл хүүгийн хамт бодогдоод 2.3 тэрбум ам.долларын өртэй болсон. 2051 он болоход энэ өр 22 тэрбум төгрөг болно. Тиймээс "Рио Тинто өнөөдрийн ханшаар  тооцож,  2.3 тэрбум ам.долларын өрийн 70 хувь буюу  1.6 сая ам.долларыг тэглэх санал тавьсан. Ингэснээр ногдол ашиг, цаашлаад ААНОАТ, санхүүгийн тооцоолол наашлах боломжтой гэсэн саналыг ирүүлсэн.

Хоёрдугаарт, Далд уурхайн бүтээн байгуулалтын ажил хойшилсон нь цар тахлын үед сөрөг үр дагаврыг авчирч байна. Өөрөөр хэлбэл, Монгол Улсын Засгийн газарт далд уурхайн бүтээн байгуулалт цаг хугацаандаа ашиглалтад орсон бол авах байсан татвар, орлого зэрэг олон зүйлээр хохирч байна гэдгийг өмнө нь захидалдаа ирүүлж байсан. Үүнтэй холбогдуулж 1 их наяд буюу 350 сая ам.долларын дэмжлэг үзүүлье гэсэн саналыг ирүүлсэн. Энэ мөнгөө гурван жил дараалан шилжүүлж, ногдол, татварт хамаарагдахгүй гэдгийг тодотгосон байсан.

Гуравдугаарт, Далд уурхайн бүтээн байгуулалтын зардал 5.4 тэрбум ам.доллараар төлөвлөсөн байсан. Цаг хугацааны хувьд зардлын хэтрэлт нэмэгдсэнд Рио-Тинто хүлчил өчиж, 5.4 тэрбум ам.доллараас дээш зардал хэтэрсэн хэтрэлтэд менежментийн төлбөр авахгүй байх, 2028 он хүртэл далд уурхайн бүтээн байгуулалтын зардлын хэтрэлттэй холбоотойгоор 2028 оны хүртэлх хугацаанд баталгааны 1.9 хувийн шимтгэлийг авахгүй зогсоох саналыг ирүүлсэн.

Дөрөвдүгээрт, засаглалаа сайжруулъя. Ингэснээр бүтээн байгуулалтын ажил илүү урагшилна. Хөрөнгө оруулагчдаас далд уурхайн бүтээн байгуулалтын зардлаа авах боломжийг Монгол Улсын Засгийн газар хангаж өгнө үү гэсэн захидлыг ирүүлсэн.

Хэлэлцээ тодорхой түвшинд урагшилж байгаа. Гэхдээ бидний хүссэн үр дүнд хүрээгүй байна. Бидний гол хүсч байгаа зүйл бол УИХ-ын 92 дугаар тогтоолыг хэрэгжүүлэх буюу хөрөнгө оруулалтын гэрээг сайжруулах явдал юм” гэлээ.

Дээрх дөрвөн саналыг хүлээж авах эсэхийг тодруулахад, тэрбээр ажлын хэсгийн хуралдаанаараа авч хэлэлцээд Ерөнхий сайдад танилцуулна. Өмнө нь тавьсан саналуудаа бид дахин тавина гэсэн байр суурьтай байна" гэдгийг тодотгов. 

Өөрөөр хэлбэл, дээрх саналууд нь хангалтгүй бөгөөд Оюутолгойн Хөрөнгө оруулалтын гэрээнд өөрчлөлт оруулахаас өөр саналыг Засгийн газар хүлээж авахгүй аж.