Рио-Тинто группээс Монгол Улсын Засгийн газарт дөрвөн асуудлаар зөвшилцөх саналыг хүргүүлсэнтэй холбоотойгоор өнөөдөр /2021.10.26/ 14 цагаас ХЗДХЯ дээр, “Rio Tinto”-ийн Зэсийн группийн захирал Б.Болд тэргүүтэй хэлэлцээний багийнхан хуралдахаар төлөвлөжээ.
Рио-Тинтогийн тавьсан саналуудыг эхлээд ажлын хэсгээрээ хэлэлцээд Ерөнхий сайдад танилцуулах юм байна. Монгол Улсын Засгийн газрын гол хүсч буй зүйл нь УИХ-ын 92 дугаар тогтоолыг хэрэгжүүлэх буюу хөрөнгө оруулалтын гэрээг сайжруулах явдал юм. Тиймээс энэ саналаа дахин тавина гэсэн байр суурьтай байгаагаа ХЗДХ-ийн сайд Х.Нямбаатар тодотгосон.
“Оюу толгой ордын ашиглалтад Монгол Улсын эрх ашгийг хангуулах тухай” 2019 оны 92 дугаар тогтоолд:
1.Монгол Улсын Засгийн газар, Эрдэнэс Оюу Толгой ХХК болон Туркойс Хилл Ресурсес Лтд, Ти Эйч Ар Оюу Толгой Лтд, Оюу Толгой Нидерланд Би Ви, Рио Тинто Интернэшнл Холдингс Лтд, Оюу Толгой ХХК нарын хооронд 2015 оны 05 дугаар сарын 18-ны өдөр байгуулсан “Оюу толгойн далд уурхайн бүтээн байгуулалт, санхүүжилтийн төлөвлөгөө” болон “Оюу толгойн далд уурхайн бүтээн байгуулалт, санхүүжилтийн нэмэлт төлөвлөгөө”-г Монгол Улсын холбогдох хууль тогтоомжийн дагуу хүчингүй болгох.
2.“Оюутолгой” ХХК-ийн татварын хяналт шалгалтын хүрээнд ногдуулсан нөхөн татвар, алданги, торгуулийг нэг мөр төлүүлж, татварын актуудыг хүлээн зөвшөөрүүлэх, татварын актад тусгагдсан асуудлаар дахин маргаан үүсгэхгүй, аливаа маргаангүй нөхцөлд яриа хэлэлцээг үргэлжлүүлэх шаардлагыг тавих.
3.Хөрөнгө оруулалтын гэрээ, Дахин тодотгож нэмэлт, өөрчлөлт оруулсан Хувь нийлүүлэгчдийн гэрээ зэрэг Оюутолгой төсөлтэй холбогдуулж байгуулсан гэрээ, хэлцлийн хэрэгжилтийг дүгнэж, Монгол Улсад хүчин төгөлдөр мөрдөгдөж буй хууль тогтоомж, Монгол Улсын эрх ашигт нийцүүлэн сайжруулахаар хэлэлцээ хийх.
Сэтгэгдэл (0)
Сэтгэгдэл бичигдээгүй байна