Огцом зан, тэсэрдэг авир, олныг цочроосон мэдэгдэл хийдгээрээ улсдаа төдийгүй дэлхий дахин зартай болон Оросын Либерал ардчилсан намын тэргүүн Владимир Жириновский хагас жилийн дотор COVID-19-ийн эсрэг вакцин зургаан удаа хийлгэсэн тухайгаа мэдэгджээ.
Түүний ярьж байгаагаар хамгийн эхний гурван вакцин нь “Спутник V” байж. Шинжилгээ өгтөл эсрэг биеийнх нь тоо цөөрсөн гэж гарсан тул гурав дах удаагийн вакциныг хийлгэсэн аж. Ахиад хагас жилийн дотор эсрэг биетийнх нь тоо цөөрөөд ирэхээр Оросын өөр нэг вакцин болох “ЭпиВак”-аас хийлгэж. Дахиад хэсэг хугацааны дараа эсрэг биетийнх нь тоо цөөрөх тоолон “ЭпиВак”-аас хоёрыг ч хийлгэсэн байна.
Ингээд зогсохгүй томууны үе ирсэнтэй холбоотойгоор томууны эсрэг вакцин хийлгээд нийт 7 вакцин хийлгэж орхижээ.
Энэ тухайгаа ярихдаа “Би ч томууны вакцин хийлгэхээсээ өмнө жил хагасын дотор зургаан удаа вакцин тариулсан. Анх удаа ингэж хийлгэсэн хүн нь бий. Тэгээд бас дээр нь томууны эсрэгийг хийлгэсэн. Долоон вакцин. Энэ мэдээж их ачаалал мөн л дөө, гэхдээ бид нэгнээ аюулгүй болгох ёстой шүү дээ” гэсэн байна.
Үүний өмнө Жириновский ээлжит удаагийн дуулиант мэдэгдлээ хийж, бас нэг маргаан дэгдээгээд авсан. Орост корона вирусийн тархалтыг зогсоохын тулд иргэддээ нэг сарын цалинтай амралт өгч, гэрт нь амруулахаар болсон. Тэгвэл Жириновский энэ цалинта амралтын улмаас Оросын эдийн засагт учирч байгаа хохирлыг Оросын Коммунист нам, Шударга Орос-Үнэний төлөө нам, Шинэ хүмүүс нам гэсэн гурван намыг хувь нийлүүлж төлөх ёстой гээд төлөхгүй гэвэл намуудын данснаас шууд суутгаж авах саналыг дэвшүүлжээ. Яагаад гэсэн асуултад хариулахдаа энэ гурван нам нь сая есдүгээр сард болсон парламентын сонгуулийн үеэр санал авахын тулд вакцин заавал хийлгэх шаардлагагүй гэсэн ухуулга явуулж байсан учраас одоо корона вирусийн тархалт дийлдэхгүй болсон гэж мэдэгджээ. Иймд энэ гурван нам нийт 60 тэрбум рублийг төлөх ёстой гэсэн байна.
30°C
Сэтгэгдэл (3)