УИХ-ын дэд дарга Т.Аюурсайханаас Оюутолгой тойрсон цаг үеийн зарим зүйлийг тодрууллаа.
Тэрбээр "Рио-Тинто групп манай талын 34 хувьд оногдох өрийн 70 хувийг нь төлөх, гурван жилийн хугацаанд 350 сая ам.долларын дэмжлэг олгох, ногдол авах хугацааг наашлуулах зэрэг санал тавьсныг хэвлэлүүдийн мэдээллээс харсан. Миний хувьд Монгол Улсын 34 хувьд оногдох өр гэдэгтэй санал нийлэхгүй. Хэрэв айлын талаас тавьсан өрийн 70 хувийг нь төлөх гэсэн саналыг нь бид хүлээж авбал нийт өрийг нь хүлээн зөвшөөрч байна гэсэн үг. Мөн 350 сая ам.долларын дэмжлэг олгоно гэсэн нь хэтэрхий бага дүн. Цаана нь хөрөнгө оруулагч тал үүнээс хэд дахин ашиг хүртэж байгаа. Рио-Тинто групп Оюутолгойгоос хүртэх ашгаас аль хэдийн авсан гэж үздэг. Тийм учраас ирүүлсэн саналуудыг маш болгоомжтой авч үзэх ёстой.
Хэрэв "Рио-Тинто группийн саналыг хүлээж авбал цаашид Оюутолгойн гэрээг огт хөндөхгүй байх үүргийг Засгийн газар хүлээнэ гэж би хувьд ойлгосон.
Оюутолгойн үндсэн Хөрөнгө оруулалтын гэрээг сайжруулах шаардлагатай. Хоёрдугаарт далд уурхайн бүтээн байгуулалт буюу Дубайн гэрээгээр Монголчууд их хэмжээний өрөнд орж, ногдол ашиг хүртэхээргүй болж байгаа. Дубайн гэрээний асуудал Захиргааны хэргийн шүүх дээр хууль бус гэдэг нь тогтоогдсон агуулгатай шийдвэр гарсан. Өөрөөр хэлбэл, энэ гэрээг хийх эрхийг олгосон Ерөнхий сайд асан Ч.Сайханбилэгийн шийдвэр хууль бус гэсэн шийдвэр гарсан гэсэн үг. Үүнд гарын үсэг зурсан эрхмүүдийн үйлдэл нь мөн хууль бус гэсэн хууль эрхзүйн дүгнэлт гарсан. Тийм учраас Монгол Улсад үйл ажиллагаа явуулж буй энэ төсөлд буюу Дубайн гэрээ хууль бус хийгдсэн гэж Монгол Улсын шүүхээс тогтоосон. Тиймээс 34 хувьд оногдох өрийг хүлээн зөвшөөрч болохгүй. Ерөнхий сайд асан Ч.Сайханбилэгийг яаралтай Монгол Улсад авчирч хэргийг нь шүүх эцэслэн шүүх ёстой. Мөн үндсэн гэрээнд олон асуудал бий" гэлээ.
Сэтгэгдэл (0)
Сэтгэгдэл бичигдээгүй байна