2021/12/06
USD 2,811

ЧУУЛГАН: Гар утасны сим картанд тоон гарын үсгийг байршуулна

Ш.АДЪЯАМАА
2021/10/28

УИХ-ын үдээс хойших чуулганы нэгдсэн хуралдаанаар Цахим гарын үсгийн тухай хуулийн төслийн  зарчмын зөрүүтэй саналуудаар санал хураалт явуулж байна.

УИХ 2011 онд Цахим гарын үсгийн тухай хуулийг батлан хэрэгжүүлж  эхэлснээс хойш есөн жилийн хугацаанд иргэн, хуулийн этгээдэд нийт 38407 тоон гарын үсэг олгосон байгаа нь тус хуулийн хэрэгжилт хангалтгүй, удаашралтай байна гэж төсөл санаачлагчид үзжээ.    

Иймд Цахим гарын үсгийн тухай хуулийн шинэчилсэн найруулгын төсөлд тоон гарын үсэгтэй холбоотой харилцааг зохицуулж, хуулийн этгээд бүртгүүлэх, банк, санхүү, сонгууль, татварын бүртгэл хийх зэрэг гарын үсэг шаардаж байгаа аливаа үйлчилгээг төрийн байгууллагаас цахим хэлбэрээр авахад болон бусад үйлчилгээнд ашиглах боломжийг бүрдүүлэхээр тусгажээ.


Ингэхдээ тоон гарын үсгийг тохиромжтой гэж үзсэн хэрэгсэл буюу иргэний үнэмлэхийн санах ой, гар утасны сим картанд тоон гарын үсгийг байршуулах боломжтой болохоор зохицуулжээ. Мөн хуулийн зохицуулалтыг олон улсын жишигт нийцүүлэн өөрчлөх, үүсээд байгаа хүндрэлтэй асуудлуудыг шийдвэрлэх замаар цахим орчинд гарын үсэг ашиглан үйл ажиллагаа явуулах боломжийг сайжруулж, хэрэглээг нэмэгдүүлж хуулийн хэрэгжилтийг хангах үүднээс хуулийн төслийг боловсруулсан байна.


Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна