УИХ-ын гишүүн Т.Аюурсайхан нарын 20 гишүүний өргөн мэдүүлсэн Жолоочийн даатгалын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэх эсэхийг өнөөдөр чуулганы нэгдсэн хуралдаанаар хэлэлцэх явцад УИХ дахь МАН-ын бүлэг тав хоногийн завсарлага авлаа. Уг хуулиар жолоочийн даатгалыг төрийн оролцоотой хийж, улмаар сан үүсгэх юм. Ингэснээр энэ салбарт хувийн хэвшлийн зах зээл хумигдах нөхцөл бүрдээд байгааг даатгалын салбарынхан шүүмжилж буй.
УИХ-аар хэлэлцэх үеэр УИХ-ын гишүүд дараах байр суурийг илэрхийлсэн юм.
УИХ-ын гишүүн Ж.Сүхбаатар: Дэлхийн улс орны жишиг ямар байгаа вэ? Төр бизнес булааж авч байна гэж байна. Ийм асуудал манай намын бодлогод байхгүй. Энэ асуудлыг бүлгээр хэлэлцэх байх. Энэ цаашилбал дуусахгүй маргаан болно шүү. Нээлттэй мэтгэлцээн явуул.
УИХ-ын гишүүн Т.Аубакир: Хувийн хэвшлийн хийж байгаа бизнес дундаас аль нэгийг нь сугалан төр оролцоод байна. Ашиг их олоод байна гэж байна. Хагартлаа ашиг олог л дээ. Төр үүнийг тууштай дэмжээд явах хэрэгтэй. Дөнгөж хөл дээрээ босож байгаа бизнесд төр оролцохоо боль. Арай гэж хийж эхэлж байгаа бизнес эрхлэгчидийн бизнесийг төр дундаас нь сугалж авдаг явдлаа болих хэрэгтэй. Энэ даатгалын компаниуд үйлчилгээгээрээ өрсөлдөх хэрэгтэй. Тийм болоцоог бид хангаж өгөх хэрэгтэй. Хэдэн зуун жилээр алдаж, онож байж энэ бизнес босдог. Өнөөдөр үйлчилж байгаа хууль журмын дагуу сангийн яам болон санхүүгийн зохицуулах хороо болохгүй байгаа асуудлыг журмаараа зохицуулаад явах боломж байгаа гэж харж байна.
УИХ-ын гишүүн Н.Учрал: Бид чөлөөт зах зээл рүү ингэж бүдүүлэг дайрч ордогоо болих хэрэгтэй. Ингэж дайрч довтолсноор улам л дордуулна. Чөлөөт өрсөлдөөн бол тухайн системийг үргэлж сайжруулж байдаг. Гэтэл төр энд оролцоод ямар өөрчлөлтийг авчрах гэж байгаа юм бэ? Төр тусгаар зөвшөөрөл олгож байгаа үйл ажиллагаагаа өөрсдөө эрхлэнэ гэвэл тэр үйл ажиллагаагаа төр өөрөө авсан нь дээр.
УИХ-ын гишүүн Х.Ганхуяг: Хуулийн нэмэлт өөрчлөлтийн зорилгыг сайн ойлгосонгүй. Ослын тоог бууруулах гээд байна уу, хувийн хэвшлийн компаниуд ашигтай ажиллаж болохгүй байна гэж үзэж байгаа юм уу? Сайн явж байгаа зүйлийг ингэж бусниулах хэрэг байна уу? Гурав, дөрвөн компани хувьцаа гаргаад явж байна, цаана нь 3000-4000 хувьцаа эзэмшигчийн асуудал байгаа.
Сэтгэгдэл (0)
Сэтгэгдэл бичигдээгүй байна