Засгийн газрын өнөөдрийн хуралдаанаар автозамын түгжрэлийг бууруулах хэд хэдэн хувилбарыг ярилцжээ. Тухайлбал, автомашины эрэлт нийлүүлэлтийг зохицуулах. Насжилт өндөртэй автомашины импортын татвар, даатгалын төлбөр, лизингийн хүүг нэмэгдүүлэх, Улаанбаатар хотод шинээр бүртгэгдэх тээврийн хэрэгслийн тоог 10 орчим мянгад хязгаарлах замаар квот тогтоох. Түүнчлэн хос хөдөлгүүртэй автомашины татварын хөнгөлөлтийг цуцлах, буруу талдаа жолооны хүрдтэй автомашиныг замын хөдөлгөөнд оролцохыг хориглох зэрэг нийт 18 санал гарсан байна.
Гэхдээ дээрх саналуудыг иргэдээсээ асууж байж эцэслэн шийдвэрлэнэ гэдгийг Нийслэлийн зам, тээврийн асуудал хариуцсан төслүүдийн удирдагч Б.Одсүрэн хэллээ. Тэрбээр “Хөдөө орон нутгаас нийслэлд жилдээ 30 мянган хүн шилжиж ирдэг. Энэ нь Ховд аймгийн хүн амтай тэнцэх хэмжээний тоо гэсэн үг. Хотын хүн ам жилдээ 70 мянгаар нэмэгдэж байна. Шилжилт хөдөлгөөн бол маш их явагдаж байна. Насжилт өндөртэй автомашины импортын татвар, даатгалын төлбөр, лизингийн хүүг нэмэгдүүлэх, Улаанбаатар хотод шинээр бүртгэгдэх тээврийн хэрэгслийн тоог 10 орчим мянгад хязгаарлах замаар квот тогтоох, буруу талдаа жолооны хүрдтэй автомашиныг замын хөдөлгөөнд оролцохыг хориглох зэрэг саналыг иргэдээс асууж байж шийдвэрлэхийг Ерөнхий сайд даалгасан” гэлээ.
Түүнчлэн Яармагаас хотын төв рүү нийтийн тээвэр нэгдүгээр эгнээгээр зорчуулах судалгааг хийж дуусчээ. Ирэх долоо хоногт Нийслэлийн Засаг даргын зөвлөлдөх хурлаар оруулж, танилцуулах юм байна.
Сэтгэгдэл (0)
Сэтгэгдэл бичигдээгүй байна