Монгол Улсад Орчин цагийн боловсрол, шинжлэх ухааны салбар үүсэж хөгжсөний 100 жилийн ойгоор Монгол Улсын Ерөнхийлөгчийн зарлигаар боловсролын салбарын нэр бүхий хүмүүст төрийн дээд цол, одон, медаль гардууллаа. Энэ үеэр "Их засаг" их сургуулийн ректор, Шинжлэх ухааны доктор Н.Ням-Осорт Монгол Улсын Ардын багш цол олголоо.
Ардын багш Н.Ням-Осор нь 1994 оноос "Их засаг" дээд сургуулийг үүсгэн байгуулж, 2011 онд "Их засаг" олон улсын сургууль болж үйл ажиллагааныхаа хүрээг өргөжүүлэн өнөөг хүртэл ректороор ажиллаж байна. Тэрбээр 40 гаруй ном, эрдэм шинжилгээ, судалгааны 70 гаруй өгүүлэл, илтгэл бичиж гадаад, дотоодод хэвлүүлсэн. Түүний боловсролын салбарт оруулсан хувь нэмрийг нь үнэлж 2000 онд Монгол Улсын гавьяат багш цол олгож байсан бол ийн өнөөдөр Ардын багш боллоо.
Ардын багш Н.Ням-Осор баярын сэтгэгдлээ хуваалцав. Тэрбээр "Төр засгаас Ардын багш гэсэн эрхэм хүндтэй цолыг салбарын маань 100 жилийн ойгоор олгосонд туйлын баяртай байна. "Их засаг" их сургуулийг маань 20 гаруй мянган оюутан төгссөн. Өнөөдөр 7 мянга орчим оюутан суралцаж байна. Боловсролын салбарт урт замыг туулж, олон жил ажилласан зүтгэлийг маань өнөөдөр төрөөс үнэллээ. Намайг өсгөж хүмүүжүүлсэн нутгийн түмэндээ баярлалаа. Багш хүнд Ардын багш цол авах шиг сайхан нэр хүндтэй зүйл алга байна" гэлээ.
Сэтгэгдэл (0)
Сэтгэгдэл бичигдээгүй байна