Австрийн Засгийн газар корона вирусийн эсрэг вакцин хийлгээгүй эсвэл COVID-оор өвдөж эдгэрээд дархлаа тогтоогүй хүмүүст хатуу хөл хорионд оруулсан байна. Ингэснээр 12 –оос дээш насны вакцин хийлгээгүй хүмүүс нэг ёсондоо гэрийн хорионд орсон байна. Тэд гарцаагүй нөхцөлд буюу дэлгүүр, эмийн сан орох, ажилдаа ирэх очихоос бусад тохиолдолд гэрээс гарах эрхгүй болжээ.
Үүний өмнө вакцин хийлгээгүй бас дархлаа тогтоогүй хүмүүсийг баар, фитнес, кино театр зэргээр орохыг хориглоод байсан юм.
Одоогоор Австрид зөвхөн вакцин хийлгэснийг эсвэл өвдөөд эдгэрч дархлаа тогтсон гэдгийг гэрчлэх тусгай сертификаттай хүмүүс л олон нийтийн газраар орж гарах эрхтэй болжээ.
Үүнээс болоод Австрийн худалдааны салбар долоо хоногт 350 сая еврогийн алдагдал хүлээхээр болоод байгааг тус улсын Худалдааны танхим мэдээлсэн байна.
Энэхүү вакцин хийлгээгүй хүмүүст зориулсан хөл хорио нь энэ сарын 24-н хүртэл үргэлжилнэ. Дараа нь Австрийн Засгийн газар үр дүнд нь анализ хийгээд цаашид сунгах эсэхээ шийдэх юм байна.
Австрид сүүлийн үед долоо хоногт корона вирусийн халдвар авсан хүний тоо 12 мянгаас буурахгүй байгаа бөгөөд өвдөж байгаа хүмүүсийн дийлэнх нь корона вирусийн эсрэг вакцин хийлгэхээс татгалзсан хүмүүс байгаа учир ийм хөл хорионы арга хэмжээ авч байгаа аж.
Вакцин хийлгээгүй эсвэл өвдөж дархлаа суугаагүй хүн хөл хориог зөрчин гадуур гарч, олон нийтийн газраар орвол 500 еврогоор торгуулах юм байна.
-2°C
Сэтгэгдэл (3)