2021/11/30
USD 2,811

Амны хаалт өвчлөлийг 53 хувиар бууруулдаг

М.Төгөлдөр
2021/11/19

Энэ тухай олон улсад нэр хүндтэй анагаахын “The BMJ”  сэтгүүлд гарсан судалгааг Британийн The Guardian сонин иш татаж олон нийтэд хүргэсэн байна. Тус судалгааг явуулсан судлаачдын үзэж байгаагаа хэдий вакцин хийлгэсэн ч гэлээ амны хаалт заавал зүүж байх ёстой гэдгийг нотолсон байна. Түүнчлэн нийгмийн зай барих, гарыг савандаж угаах зэрэг нь халдвар тархахаас сэргийлэх тун ч үр дүнтэй арга мөн гэдгийг эрдэмтэд судалгааны явцад тогтоосон байна. Гэхдээ халдвараас сэргийлэх эмийн бус арга дотроос хамгийн өндөр үр ашигтай нь амны хаалт зүүх гэдгийг судлаачид онцолжээ.

Дэлхийн олон оронд явуулсан 30 гаруй бие даасан судалгаа нь амны хаалт зүүвэл халдвар авах эрсдэл 53 хувиар багасдаг гэдгийг баталсан байна. Харин нийгмийн зай барихад халдвар авах эрсдэл 25 хувиар буурдаг аж. Гарыг савандаж угаах нь өвдөх эрсдэлийг мөн 53 хувиар бууруулдаг ч энэ талаар хийсэн судалгааны тоо нь харьцангуй цөөн тул цаашид нарийвчлан судлах шаардлагатай гэж үзжээ.

Цар тахал дөнгөж эхэлж байхад дэлхийн дийлэнх улс оронд бүх нийтээр амны хаалт заавал зүүх дэглэм үйлчилж байсан. Гэвч хоёр жилийн дараа зарим улсууд амны хаалт заавал зүүхээс татгалзах болсон байна. Харин эдгээр шинэ судалгаа нь амны хаалтыг цаашид ч зүүсэн хэвээр байх ёстой гэдгийг нотлон харуулсан хэрэг болжээ. The Guardian –ы үзэж байгаагаар вакцинжуулалттай адилаар амны хаалт заавал зүүх нь иргэдийг цар тахлаас хамгаалах хамгийн бодит аргуудын нэг.


Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна