Хятадад биткойн олборлохтой хатуу тэмцэнэ

Хятадын эрх баригчид төрийн өмчит болон төрийн мэдлийн компани, үйлдвэрүүдийг крипто валютын майнинг хийхийг хатуу хориглож, хоригийг зөрчсөн компаниудын эсрэг хатуу арга хэмжээ авахаар болж байгаа тухай Bloomberg мэдээлжээ . Үүний тулд Хятадын Хөгжил ба өөрчлөлтийн үндэсний комисс нь биткойны үйлдвэрийн түвшний олборлолт хийх, төрийн өмчит компаниудыг майнингт ямар нэг байдлаар оролцохыг зүйл бүрээр таслан зогсоох арга хэмжээ авч эхэлсэн байна.

Жишээлбэл, Цзянси мужийн удирдлагад өндөр албан тушаал эзэлдэг Сяо И гэгчийг эрх мэдлээ ашиглан крипто валют олборлодог компаниудад давуу эрх олгосон, дэмжлэг үзүүлсэн хэрэгт буруутай гэж үзэн бүх өмчийг нь хурааж эх орноосоо хөөсөн байна.

БНХАУ нь энэ жил улсын хэмжээнд крипто валют олборлох ба түүгээр арилжаа хийхийг албан ёсоор хориглосон. Хятадын ардын банк нь крипто валют нь уламжлалт валюттай адилаар зах зээл чөлөөтэй эргэлдэх ёсгүй, гадаадын биржүүдийг их газар байрладаг хөрөнгө оруулагчдад койны үйлчилгээ үзүүлэх ёсгүй гэж мэдэгдсэн юм. Крипто валют буюу янз бүрийн койнуудын үнийн бүтэц ойлгомжгүй, баталгаа үгүй тул их эрсдэл дагуулдаг,  нийгэмд бухимдал дургүйцэл төрүүлэх магадлал өндөртэйгөөс гадна олборлох явцад хомсдоод байгаа цахилгаан эрчим хүчийг ямар ч үр ашиггүй асар ихээр зарцуулдаг гэж үзсэн тул ийнхүү хориглоод байгаа юм байна.