Өнөөдөр Монгол Улсад төсвийн 32 тэрбум 490 сая 800 мянган төгрөгөөр Богд Зонховын хөшөө барих зайлшгүй, тулгамдсан хэрэгцээ шаардлага бий гэж үү? Түүх, шашны соёлыг дэлгэрүүлэх төв “Богд Зонхов” (Улаанбаатар Чингэлтэй дүүрэг, Тасганы овоо)-нд энэ мөнгийг зарцуулах нь.
Түлэнхийн төвөө барьж чадалгүй хэдэн он улирч, өвчиндөө шаналж уйлах үрсийн нулимс одоо ч урссаар... Ганцхан жишээ нь, энэ шүү дээ. Гэтэл хөшөө, бас дахин хөшөө... Хөшөөний эх орон болжээ.
У.Хүрэлсүх Засгийн газрын тэргүүнээс өөрийн саналаар огцрохын өмнөх өдөр гаргасан тогтоолын хавсралтад энэ төвийг 5 тэрбум 500 саяар барьж ашиглалтад оруулахаар тусгагдсан мэдээллэл байна. Харин Сангийн сайд асан Ч.Хүрэлбаатар энэ тухай өөрийн цахим хуудаснаа “Богд Зонховын хөшөөг У.Хүрэлсүхийн Засгийн газар, Ч.Хүрэлбаатар төсөвт тусгаад, сая өртгийг нь 27 тэрбумаар нэмжээ гээд өмнөх засаг, над руу бухаж байх шиг. Гүтгэлэг. У.Хүрэлсүхийн Засгийн газар төсөв өргөхөд Богд Зонхов огт байгаагүй, УИХ дээр 3 гишүүний саналаар нэмэгдсэн, ТБХ өртөг нэмээгүй гэдгийг хэлье” гэжээ.
Эрүүл мэнд, боловсролын салбар нь “шалан дээр” шахуу байгаа өнөөдрийн нөхцөлд хэн гээч 3 гишүүний толгойд “бурхан шашны соёлыг дэлгэрүүлэх төв”-д ийм их хэмжээний мөнгө зориулья гэдэг санаа ордог юм бол? УИХ-ын хэн хэн гээч гишүүд энэ саналыг дэмжиж, батлав?
Анх 5 тэрбум 500 сая төгрөгийн өртөгтэй байхаар төлөвлөгдөж, батлагсан төсөвт өртөг хэзээ, чухам юуны учир 32 тэрбум 490 сая 800 мянга болж өсөв?
Өвчиндөө шаналж буй иргэдийн зовлон, шанлалыг энэ мэт барилга байшин, хөшөө дурсгал нимгэлэх үү? Бид ер нь чив чимээгүй мөргөөд л, залбираад л, сүслээд л сууж байх ёстой юм биш үү, шашиндаа ч, төрдөө ч.
Дашрамд сануулахад Монгол Улсын 2022 оны төсөв 2 их наяд 300 тэрбум төгрөгийн алдагдалтай батлагдсан, арай л уу..?
Зариг энэ асуудлыг үргэлжлүүлэн сурвалжлах болно.
Сэтгэгдэл (0)
Сэтгэгдэл бичигдээгүй байна