2022/05/19
USD 2,811

ЦЭВЭР УСНЫ 3-Р ШУГАМЫН БҮТЭЭН БАЙГУУЛАЛТ ШИНЭ ОНЫ ӨМНӨ ДУУСНА

М.Төгөлдөр
2021/12/06

    “Эрдэнэт үйлдвэрийн удирдлагууд үйлд-вэрлэлийн хүчин чадал нэмэгдэж, хот өргөжихийн хэрээр цэвэр усны хэрэглээ өсөж буйг харгалзан үзэж усан хангамжийн төв шугам хоолойг шинээр тавих асуудлыг 2020 онд шийдвэрлэсэн. Эрдэнэт үйлдвэрийн төдийгүй Эрдэнэт хотын усан хангамжийн найдвартай ажиллагаа, аюулгүй байдлыг бүрэн хангах түүхэн бүтээн байгуулалтын барилга угсралт энэ сарын 10-нд дуусна” гэж Ус хангамжийн цехийн дарга Г.Батмөнх мэдээллээ. Одоогоор цэвэр ус дамжуулах 3-р шугамын угсралтын ажил 98 хувьтай яваа бөгөөд ус өргөх өртөөнүүд, түүний хооронд байрлах хаалт, арматурын угсралт хийгдэж байна. Өнгөрсөн долоо хоногт гүйцэтгэгч “Хаппи бюлдинг” компанийнхан төмөр зам доогуур труба сүвлэх ажлыг амжилттай гүйцэтгэжээ. Барилга угсралтын ажил бүрэн дууссаны дараа ундны усны стандарт түвшинд хүртэл шугам хоолойг цэвэрлэх, ариутгах, усан даралтаар турших ажлыг зураг төслийн зохиогчийн зөвлөмжийн дагуу хийх юм.

Ус хангамжийн цех 65 км-ийн алс Сэлэнгэ мөрний хөвөөнөөс Эрдэнэтийн усан сан хүртэл татсан хос шугам хоолойгоор хоногт 62 мянган м3 цэвэр ус татаж, хэрэглэгчдэд түгээдэг. Хос шугамын нэг нь 1976 онд, нөгөө нь 1988 онд ашиглалтад орсон бөгөөд олон арван жилийн эдэлгээний явцад нимгэрч, ачаалал даахгүй эрсдэл үүсэх хэмжээнд хүрчээ. Хэрэв нэг шугамд гэмтэл гарвал зөвхөн ганцаар үйлдвэрийн болон хотын цэвэр усыг хангах боломжгүй тул гурав дахь шугамыг татах зайлшгүй шаардлага үүссэн. Орхон аймаг болон Эрдэнэт үйлдвэрийн аюулгүй байдалтай холбоотой, нийгэм ахуйн өндөр ач холбогдолтой цэвэр усны 3-р шугамын бүтээн байгуулалтыг шинэ оны өмнө дуусгахаар тус цехийн ажилтнууд, гүйцэтгэгч компанийнхантай хамтран шаргуу ажиллаж байна. 


Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна