2022/05/18
USD 2,811

Монгол, Хятадын иргэд харилцан зорчих хязгаарлалтыг сулруулах боломжийг судлахаар тогтлоо

М.Төгөлдөр
2021/12/23

Монгол Улс, БНХАУ-ын ГХЯ-д хоорондын Стратегийн яриа хэлэлцээний 6 дахь удаагийн уулзалтыг 2021 оны 12 дугаар сарын 23-ны өдөр цахим хэлбэрээр зохион байгуулав.

Уулзалтыг монголын талаас Гадаад харилцааны дэд сайд Б.Мөнхжин, хятадын талаас Гадаад хэргийн яамны туслах сайд У Жянхао ахлан оролцов.

           Хоёр улсын ГХЯ-д хооронд дэд сайдын түвшинд жил бүр зохион байгуулдаг тус яриа хэлэлцээний механизмаар хоёр улсын харилцааны хөгжлийн явцыг дүгнэж, ойрын хугацааны зорилт, томоохон арга хэмжээний талаар ярилцахын зэрэгцээ бүс нутаг, олон улсын хамтын ажиллагааны асуудлаар санал солилцдог.

    Гадаад харилцааны дэд сайд нар цар тахлын нөхцөлд Монгол, Хятадын харилцаа бүхэлдээ амжилттай хөгжиж буйд сэтгэл хангалуун байгаагаа илэрхийлж, 2021 онд  хоёр улсын Төрийн тэргүүн, Парламентын дарга, Ерөнхий сайд нар тус тус утсаар ярилцаж,  өндөр түвшний харилцан айлчлал хэрэгжүүлснийг онцлон тэмдэглэв. Талууд ирэх онд дээд, өндөр түвшний харилцан айлчлал, уулзалтыг зохих хэлбэрээр зохион байгуулахаар тохиролцов.

     Дэд сайд нар хоёр улсын худалдаа, эдийн засгийн хамтын ажиллагаа өмнөх оноос сэргэж, худалдааны эргэлтийн хэмжээ мэдэгдэхүйц нэмэгдэж буйг тэмдэглэв. Түүнчлэн Ковид-19 цар тахлын нөхцөлд хоёр орны худалдаа эдийн засгийн хамтын ажиллагааг аль болох хэвийн явуулах боломж, тэр дундаа хилийн боомтуудын үйл ажиллагааг идэвхжүүлж, бараа бүтээгдэхүүн нэвтрүүлэлтийг нэмэгдүүлэх талаар дэлгэрэнгүй санал солилцов. Манай талаас Замын-Үүд-Эрээний боомтоор авто тээврийн үйл ажиллагааг шуурхай сэргээх, төмөр замын тээврийг хэвийн байдалд оруулах,  уул уурхайн бус бүтээгдэхүүний экспортыг сэргээх,  Шивээхүрэн-Сэхээ, Бичигт-Зүүнхатавч боомтын үйл ажиллагааг сэргээх, Гашуунсухайт-Ганцмод, Ханги-Мандал боомтуудын бараа нэвтрүүлэлтийг нэмэгдүүлэх, Гашуунсухайт-Ганцмод, Шивээхүрэн-Сэхээ, Булган-Такашикен, Бичигт-Зүүнхатавч, Ханги-Мандал боомтуудаар тусгай зөвшөөрөл, нөхцөл шаардагддаг бараа бүтээгдэхүүн тээвэрлэх нөхцөлийг бүрдүүлэх зэрэг тодорхой санал дэвшүүлэв. Хятадын тал эдгээр саналыг чухалчлан үзэж, холбогдох арга хэмжээ авахаа илэрхийлэв. Үүний зэрэгцээ халдвар хамгааллын арга хэмжээг сайжруулж, халдвар хил дамнан тархах эрсдлийг бууруулах нь боомтуудаар бараа нэвтрүүлэлтийг нэмэгдүүлэхэд хамгийн чухал хүчин зүйл болохыг онцлон тэмдэглэв.

Дэд сайд Б.Мөнхжин Монгол Улсын цар тахалтай тэмцэх үйл ажиллагаанд хятадын  талаас дэмжлэг үзүүлж, вакцин болон бусад бараа материалыг буцалтгүй тусламжаар үзүүлсэнд  талархал илэрхийлэв.

Талууд цар тахлын нөхцөл байдалтай уялдуулан иргэд харилцан зорчих хязгаарлалтыг сулруулах боломжийг судлахаар тогтов.

Талууд мөн олон улс, бүс нутгийн харилцан сонирхсон асуудлаар санал солилцож, бүс нутаг, олон талт хамтын ажиллагааны механизмуудын хүрээн дэх хамтын ажиллагаагаа цаашид ч бэхжүүлэхийн төлөө байгаагаа илэрхийлэв.


Сэтгэгдэл (2)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
202.179.25.116
Мөнхжин дэд сайдад баяр хүгэе. Энэ засгийн газарт овоо юм хийгээд байгаа нь энэ залуу. Эрээний боомтоос болж хүмүүст мөнч их чичлүүлсэндээ. Аргаа бараад өөрөө очиж арай гэж ачаа бараагаа татах ажлыг эхлүүлээд ирхэд хятадууд элдэв шалтаг гаргаад буцаад хилээ хаачхаж байгаа юм. Яалтай билээ. Одоо нэг гайгүй болох байгаадаа. Эрээний хил хаагдсанаар “үндэсний үйлдвэрлэгчид”-н тар нь танигдлаа. Бид чинь монголчууд дотооддоо овоо юм хийдэг болж гэж баярлаад байсан чинь худлаа байж. Тэд Хятадаас бөөндөж оруулаад савалдаг юм байна.
Хариулах
202.126.89.222
Za baahan hujaa naashaa jihhen de
Хариулах