Монгол Ардын намын Ерөнхий нарийн бичгийн дарга Д.Амарбаясгалан “Syndicate Talk” нэвтрүүлэгт зочноор оролцон дэлгэрэнгүй ярилцлага өгчээ.
1990 оноос хойш хамгийн урт хугацаанд буюу зургаан жил Монгол Ардын намын Ерөнхий Нарийн бичгийн даргын албан тушаалыг хашиж, дөрвөн удаа улиран сонгогдоод байгаа Д.Амарбаясгалан энэ ярилцлагаараа улс төрийн намуудын шинэчлэл, МАН-ын 30 дугаар Их хурал, Монгол Улсын Ерөнхий сайд эдийн засгийн тусгаар тогтнолын төлөөх “Зууныг эхлүүлэх зургаан сэргэлт”-ийн бодлогын талаар хөндөж ярилцсан байна.
Тэрбээр “МАН дотроо байгаа алдаа, дутагдлуудаа засаж залруулна. Нийтлэг эрх ашгийн төлөө буюу ард түмнийхээ өмнө амласан амлалтаа биелүүлэх үүрэгтэй 280 гаруй мянган гишүүнтэй улс төрийн намын нэрийн өмнөөс хариуцлагатай ажиллахыг төрийн бүх түвшинд зарчим болгож явна. Хүний эрхийг дээдэлсэн, авилга, албан тушаалын гэмт хэргээс ангид, хүнд сурталгүй, хариуцлагатай төрийн албыг бий болгож төлөвшүүлэхийн төлөө бид зорино. Хүний эрхийг хамгаалахын тулд суурь болсон хууль эрх зүйн орчныг ойлгомжтой, бат бэх болгох, орчин үеийн хэрэгцээ шаардлагыг бүх салбарт хангуулахаар ажиллаж байна. Өмнө нь батлагдсан маш олон хуулиуд голцуу зөвхөн мэргэжлийн байгууллагуудын санал дээр үндэслэгдсэн байдаг. Харин аливаа хуулийг батлахдаа иргэдийнхээ эрх ашгийг нэн тэргүүнд тавьдаг болно. Эрх чөлөөт нийгэм, ардчилсан тогтолцооны хамгийн том дайсан авилга, хүнд суртал, хариуцлагагүй байдал, албан тушаалын гэмт хэрэг байдаг.
.Эрх баригч намын хувиар энэ бүхэнтэй тэмцэх бодлогыг бид өөрсдөөсөө эхлэн гаргаж дотроо баталсан. 30 дугаар их хурлын үеэр эдгээр заалтыг намын дүрэмдээ оруулсан. Нэгт, авилга, албан тушаалын гэмт хэрэгт холбогдсон этгээд МАН-ын удирдах байгууллагад удирдах албан тушаалд сонгогдох боломжгүй. Хоёрт, энэ намын нэрийн өмнөөс аливаа шатны сонгуульд нэр дэвших боломжгүй. Гуравт, энэ намаас улс төрийн дэмжлэг авч аливаа шатанд улс төрийн үйл ажиллагаанд оролцох, улс төрийн ажил хийх боломжгүй” хэмээн онцолсон байна.
Эндээс харахад эрх барьж байгаа МАН дүрэмдээ өөрчлөлт оруулж, авлига хээл хахуультай тэмцэх, гэмт хэрэгт холбогдсон хүмүүст ямар нэг боломж олгохгүй гэдэг байр суурин дээрээ хатуу байгаа бололтой.
Сэтгэгдэл (0)
Сэтгэгдэл бичигдээгүй байна