Казахстанд дэгдсэн шатахууны үнийн өсөлтийн эсрэг жагсаал ахар богино хугацаанд улс төрийн шинжтэй ээлжит өнгөт хувьсгалын төрхтэй болж өөрчлөгдлөө. Ерөнхийлөгч Касым-Жокар Токаев уурлаж бухимдсан иргэдийг тайвшруулахын тулд зарим арга хэмжээг авсан ч үймээн үргэлжилсээр байна. Жишээлбэл, шатахууны үнийг буцаан буулгаж, өмнөхтэй адил болгосон, экс Ерөнхийлөгч Назарбаевыг Үндэсний аюулгүйн зөвлөлийн даргын тушаалаас буулгасан ч жагсагчид тайвширсангүй.
Одоо Казахстаны бүх том хотуудад эрх баригчдыг эсэргүүцсэн жагсаал цуглаан болж байна. Алма-Атад гэхэд л жагсагчид хотын захиргааны байр, прокурорын газар, зэрэг төр захиргааны байшин барилгыг дайран эзлэн түймэрджээ. Алма-Атад үймээнийн далимдуулагчид олноор дээрэм тонуул хийж эхэлсэн тухай мэдээлж байна. Тэд том гудамж талбай тойрсон 400 гаруй кафе, зоогийн газрыг дээрэмдсэн тухай мэдээ ч ирж байна. Одоо тонуулчид хотоор тарж банкны АТМ машин эвдэлж тонох дээр голлож байгаа аж.
Мөн үймээн Казахстаныг бүхэлд нь хамарсантай холбоотойгоор Назарбаевын найз бизнесмэнүүд зугтаж эхэлсэн байна. “Eurasian Resources Group”-ийн эзэн Патох Шодиев хувийн онгоцоороо Казахстыг орхижээ. Казахстаны хамгийн баян 50 хүний нэг Кенес Ракишев мөн хувийн онгоцоороо Казахстанаас зугтсан байна. Назарбаевын охин Динара хувийн онгоцоороо Казахстанаас зугтан Киргизийг зорьжээ.
“Радио Аззатык”-ийн сэтгүүлчийн мэдээлснээр Казахстын баруун хязгаарын Атырау хотод цагдаа нар жагсагчдын эсрэг галт зэвсэг ашиглахад нэг хүн толгойдоо шархдан нас баржээ.
Сэтгэгдэл (0)
Сэтгэгдэл бичигдээгүй байна