Манай улсын иргэдээс омикрон хувилбар илэрчээ

Манай улсад албан ёсоор омикрон хувилбар бүртгэгдээгүй байгаа ч Монгол Улсаас Япон руу хамгийн сүүлд нислэгээр очсон Монгол иргэдээс омикрон хувилбар илэрсэн гэсэн мэдээлэл байна. Тус онгоцоор зорчсон бүх монгол иргэнийг байрлаж буй газруудаас нь авч тусгаарлах ажлыг зохион байгуулж байгаа аж. 

Энэ сарын 4-нд Аэромонголиа ХХК-ийн нислэг мөн 5-нд МИАТ Япон руу нислэг үйлдсэн байна. Мөн ирэх долоо хоногийн 11, 12-ны өдрүүдэд Япон руу үйлдэх хоёр нислэг байна. 

Үүсээд байгаа нөхцөл байдалтай холбогдуулж Засгийн газар ээлжит бусаар яг одоо хуралдаж байна. Мөн өнөө өглөө УОК-ын Нэгдсэн шуурхай штабаас коронавируст халдварын шинэ хувилбар Омикрон вирусээс урьдчилан сэргийлэх төлөвлөгөө боловсруулсан.

Дэлхийн эрүүл мэндийн байгууллага омикрон хувилбарыг бүртгээд нэг сарын хугацаа өнгөрч байгаа бөгөөд одоогоор дэлхийн 138 улсад тус хувилбарын тохиолдол бүртгэгдээд буй.

 Манай улс өмнө нь альфа болон дельта хувилбарыг илрүүлэхэд Япон руу сорьж явуулж шинжлүүлж байсан. Энэ удаад ч мөн Суданаас ирсэн энхийг сахиулагчдын шинжилгээнээс омикрон хувилбар мөн эсэхийг тодруулахаар 100 сорьцыг явуулсан. Уг шинжилгээни хариу энэ сарын сүүлээр гарна гэж ЭМ-ийн сайд С.Энхболд мэдээлсэн.