Ц.Цэрэнпунцаг: "Богд Зонхова" төсөл агаарын бохирдлыг бууруулна, энэ төсөлд хүн бүр хоолныхоо 10 мянгыг хандивласан гээд л бодчих

Оны өмнө Эдийн засгийн байнгын хорооны хуралдааны үеэр УИХ-ын гишүүн Ц.Цэрэнпунцаг өөрийн санаачилсан "Богд Зонхова" төслөө цааш нь явуулна, сайд нар хэл амнаас битгий айгаад бай" гэсэн байр суурийг илэрхийлсэн. Тодруулбал, тэрбээр "Засгийн газар ажил хийхдээ сошиал дагаж байна. Зарим ажлыг хийхдээ  нийгмийн сүлжээ дагавал юу болох вэ. Богд Зонхова төслөөс юунд хулгаад байгаа юм бэ. Анх 5.5 тэрбумаар төсөвлөж байсан. Уг төсөл тав, зургаан хэсэгтэй. Жуулчид Улаанбаатарт юу үзэх юм бэ. Буруу зөрүүг нь тогтоох газар тогтоох байх. Яам, Засгийн газар өмнөх ажлаа хий. Богд Зонхова төсөв үргэлжлэх ёстой гэж үзэж байна. Инженерийн шугам сүлжээнд долоон тэрбум шаардлагатай. Тасганы овоог бохирын цэг болгох гээд байгаа юм уу. Яагаад идэвх гаргахгүй байна. Богд Зонхова төсөлд буруу хийсэн зүйл байхгүй. Иймд энэ төсөл үргэлжлэх ёстой. Соёлын сайд соёлоо хамгаалах ёстой шүү" гэдгийг хатуу хэлсэн. 

Цар тахалтай энэ үед яагаад бурхан шашны төсөлд төсвийн мөнгийг зарцуулах гэж "зүтгээд" байна вэ гэдгийг УИХ-ын гишүүн Ц.Цэрэнпунцагаас шууд тодрууллаа. 

Тэрбээр "Цар тахал цааш хэдэн жил үргэлжилнэ, энэ үед улс орны амьдрал үргэлжилнэ. Цар тахлын үед эдийн засгийн бусад салбаруудаа ч бид анхаарах ёстой. Эдийн засгаа сэргээж байж ард түмний амьдрал сайжирна. "Богд Зонхова" төсөл долоон жилийн дотор өртгөө нөхөх юм билээ. Өвчин зовлон арилсны дараа жуулчид манайд ирнэ. Гандан хавиар жилд 300 мянган жуулчин очдог гэсэн судалгаа байна лээ.  7-8 жилийн дотор зардлаа нөхөх сайн төсөл гэдэг утгаар нь би хэлсэн. Өртөг зардлаа буцаагаад олох бүтээн байгуулалтад яагаад хөрөнгө оруулалт оруулж болохгүй гэж. Ашигтай хөрөнгө оруулалтад төсвийн мөнгийг зарцуулах ёстой. Энэ төсөл агаарын бохирдлыг бууруулахад ч ашиг тусаа өгнө. Давхар олон асуудлыг шийдэж байгаа төсөл".