Сайжруулсан шахмал түлшнээс дээж авахад стандартад нийцсэн дүн гарчээ

БОАЖЯ, ЦЕГ, ОБЕГ, ЦУОШГ, Таван Толгой түлш ХХК болон бусад холбогдох албаныхан нийслэлийн агаарын чанарын өнгөрсөн долоо хоногийн мэдээллийг хүргэлээ. Өнгөрсөн долоо хоногт БОАЖ-ын сайд Н.Уртнасан, Эрчим хүчний сайд Н.Тавинбэхээр ахлуулсан ажлын хэсэг "Таван толгой түлш" ХХК-ийн баруун, зүүн бүсийн үйлдвэрт болон нийслэлийн айл, өрхүүдэд гэнэтийн шалгалт хийсэн. Харин уг шалгалтын ажлын дүгнэлтүүд эхнээсээ гарч байгаа бөгөөд нэгдсэн байдлаар танилцуулна гэдгийг холбогдох албаныхан мэдээллээ.

Мөн мэдээллийн үеэр "Таван толгой түлш" ХХК-ийн Нүүрс боловсруулах үйлдвэрийн дарга Х.Галымбек "Сайжруулсан шахмал түлшний тухайд нөөц хэвийн байна. Бид стандарт, чанарын хяналт шалгалтыг байнга хийдэг учир ямар нэгэн асуудал гараагүй. Үйлдвэрийн тухайд өдөр бүр бүтээгдэхүүнийг шалгадаг. Барьцалдуулагч болоод бусад зүйлс дээр мэргэжлийн байгууллага шинжилгээ хийж явдаг. Иргэд айл өрхүүдэд түүврийн аргаар хяналт, шалгалт хийхэд чанарын асуудал гараагүй" гэдгийг хэлсэн бол НМХГ-ын Агаарын чанарын хяналтын хэлтсийн мэргэжилтэн Б.Угтахбаяр "Тавантолгой түлш" компанийн зүүн болоод баруун бүсийн үйлдвэрээс дээж авахад шинжилгээгээр стандартад нийцээгүй зүйл гараагүй гэдгийг хэлсэн юм.