Улаанбаатар хотын агаарын чанар “IQAir” Швейцарийн агаарын чанарын технологийн компанийн цахим сайтын мэдээллээр агаар дахь PM2.5 тоосонцорын агууламж ДЭМБ-аас гаргасан агаарын чанарын жилийн дунджаас 13.5 дахин их байгаа юм. Монгол Улсын агаарын чанарын стандартаар PM2.5 тоосонцорын 24 цагийн өдрийн дундаж хүлцэх хэмжээ 50 мкг/м3 байдаг. Тэгвэл өнөөдөр "Таван толгой түлш" ХХК-ийн Нүүрс боловсруулах үйлдвэрийн дарга Х.Галымбек "Сайжруулсан шахмал түлшний тухайд нөөц хэвийн байна. Бид стандарт, чанарын хяналт шалгалтыг байнга хийдэг учир ямар нэгэн асуудал гараагүй. Үйлдвэрийн тухайд өдөр бүр бүтээгдэхүүнийг шалгадаг. Барьцалдуулагч болоод бусад зүйлс дээр мэргэжлийн байгууллага шинжилгээ хийж явдаг. Иргэд айл өрхүүдэд түүврийн аргаар хяналт, шалгалт хийхэд чанарын асуудал гараагүй" гэдгийг хэлсэн бол НМХГ-ын Агаарын чанарын хяналтын хэлтсийн мэргэжилтэн Б.Угтахбаяр "Тавантолгой түлш" компанийн зүүн болоод баруун бүсийн үйлдвэрээс дээж авахад шинжилгээгээр стандартад нийцээгүй зүйл гараагүй гэдгийг хэлсэн юм.
Харин Орчны бохирдлыг бууруулах үндэсний хорооны ажлын албаны дарга Б.Алтанзул хэлэхдээ "Нийслэлийн агаарын бохирдол нэмэгдэж буй шалтгаан нөхцөлийг судалж, гал түлж буй үйл явцыг үзсэн. Агаарын бохирдолд зөвхөн шахмал түлш нөлөөлж байна гэж ойлгож болохгүй. Үүнд чанаргүй шатахуун, насжилт өндөртэй автомашинууд маш их утаа ялгаруулж, агаар бохирдуулж байна" гэдгийг хэлж байлаа.
Сэтгэгдэл (0)
Сэтгэгдэл бичигдээгүй байна