Хөгжлийн банкнаас олгосон зээлийг эргэн төлөөгүй, "Чанаргүй" гэсэн ангилалд орж, улмаар шүүхээр нэхэмжилсэн компаниудыг тус банкнаас зарласан. Өөрөөр хэлбэл, Хөгжлийн банкны олгосон нийт зээлийн 55.3 хувь нь чанаргүй зээлийн ангилалд оржээ. 2014-2019 онд зээл аваад өдийг хүртэл төлөөгүй 25 компанийг Хөгжлийн банк шүүхэд өгч, 841 тэрбум төгрөгийн нэхэмжлэл гаргасан.
Энэ талаар УИХ-ын гишүүн Б.Энхбаярын байр суурийг тодрууллаа.
Тэрбээр "Би 2016 оны наймдугаар сарын 8-нд Хуульзүйн дэд сайдаар томилогдож байсан. Маргааш өдөр нь би Хөгжлийн банкыг шалгах Засгийн газрын ажлын хэсгийг ахалж, ажилласан. Үндсэндээ гурван долоо хоног шалгаж, нийтдээ 1.3 их наяд төгрөгийн зөрчлийг илрүүлсэн. Нийтдээ 40 гаруй хуудас материалыг шалгуулахаар хуулийн байгууллага руу шилжүүлсэн. Өнөөдрийн зарласан ААН-үүд тухайн үед байж л байсан. Зээлийн хугацаа нь хэтэрсэн улс төрийн хамаарал бүхий компаниудад барьцаа хөрөнгөгүй зээл олгосон байх жишээний. Хөгжлийн банк авлигчдыг хөгжүүлэх банк болж хувирсан байсан. Хөгжлийн банкны хуулийг өөрчлөх шаардлагатай гэсэн дүгнэлт гарсан. УИХ-аас баталсан хөгжлийн төсөл, хөтөлбөрүүдийг санхүүжүүлнэ гэсэн хуулийн заалтыг огт хэрэгжүүлдэггүй. Ямар төсөл нь улс орны хөгжлийн шинж чанартай вэ гэдгийг тухайн захирал нь эсвэл нэг сайд мэддэг. Ингэж л дураараа төрийн мөнгөөр тоглосон. Үүнд үе үеийн нөхдүүд хамаарагдана, хүний, өөрийн хамаагүй. Тухайн үед намайг Хөгжлийн банкны зөрчлийг гаргаж тавьсны төлөө "Танай намынхнаар дамжуулж чамайг зайлуулна" гэж хэлээд дэд сайдаас зайлуулж байсан, гар хөл нь маш урт" гэлээ.
Сэтгэгдэл (0)
Сэтгэгдэл бичигдээгүй байна