АНУ болон Европын хэвлэл мэдээллийн хэрэгслүүд Оросыг хэзээ дуртай үедээ Украйныг эзлэхээр дайрах гэж байгаа тухай мэдээгээр “бөмбөгдсөн” хэвээр. Энэ удаад “Reuters”, “Financial Times”, “AFP”, “The Wall Street Journal”, “The New York Times” гэсэн эх сурвалжууд Оросыг Украйны руу бүрэн хэмжээний дайралт хийхэд шаардлагатай хүчнийхээ 70 хувийг хил дээр бөөгнөрүүлсэн тухай мэдээллийг нэгэн зэрэг цацжээ.
Мөн Орос дайрсан тохиолдолд талуудын амсаж болзошгүй хохирлын талаарх тооцоог олон нийтэд хүргэж. Тэдний тооцоолсноор оросууд дайрвал Киев хотыг хэдхэн өдрийн дотор эзэлнэ гээд энэ зуур Украйн 5-25 мянган цэргээ алдах бол 25-50 мянган энгийн иргэн амиа алдана гэжээ. Харин оросуудыг 3-10 мянган цэргээ алдана гэсэн байна. Түүнчлэн сая гаруй иргэд Польшоор дамжин Европ руу дүрвэнэ гэжээ.
АНУ болон Европын мэдээллийн хэрэгслүүд бүр өнгөрсөн оны арваннэгдүгээр сараас эхлэн Оросыг Украйн руу дайрах гэж байгаа тухай мэдээлэхдээ дайралт эхлэх огноог янз бүрээр мэдээлж ирсэн. Анхандаа католик шашны зул сарын баяраар гэж байсан бол өөрчлөгдөж шинэ оны эхний өдөр байснаа ахин өөрчлөгдөж, Оросуудын тэмдэглэдэг “хуучин шинэ жил”-ээр байснаа ахин өөрчлөгдөж, Үнэн алдартнуудын зул сарын баяр болоод байснаа Олимпын тоглолт эхлэх гэж хүртэл зааж байсан. Харин энэ удаад оросууд украйнд эрс хүйтэрч хөрс хөлдөхийг хүлээж байгаа гэж мэдээлжээ. Улмаар хоёрдугаар сарын 15-нд Украйн даяар хөрс хөлдөж, хүнд техник саадгүй явах боломжтой болох тул дайралт эхлэх өндөр магадлалтай гэсэн байна.
Харин ОХУ нь энэ бүх таамаг, тооцоог ухаан солиотой хүний дэмийрэл, Орост Украйн руу дайрах ямар ч төлөвлөгөө байхгүй, хэзээ ч байгаагүй гэж мэдэгдсэн хэвээр байна.
Сэтгэгдэл (0)
Сэтгэгдэл бичигдээгүй байна