Ж.Эрхэмбаатар: Өөрсдийнхөө төлөө үйлдвэр барьчихаад улсын төлөө мэт ярихаа боль, тэд л ашгаа хүртэнэ

Хөгжлийн банкнаас олгосон хугацаа хэтэрсэн, чанаргүй ангилалд хамруулсан нийт 52 зээл нь Хөгжлийн банкны тухай хууль, Зээлийн журам, зээлийн бодлогын баримт бичиг зэрэг хууль тогтоомжийн дагуу олгогдсон эсэх, Хөгжлийн банкны эрх бүхий албан тушаалтнууд албан үүрэг, бүрэн эрхээ урвуулан ашиглаж, зээлдэгч аж ахуйн нэгжүүдэд давуу байдал бий болгож, хууль бусаар олгосон эсэх, хахууль авч, төрд хохирол учруулсан эсэхийг тогтоохоор дээрх холбогдох байгууллагуудтай хамтран чанаргүй зээлэгчидтэй холбоотой нийт 55 удаагийн биечлэн уулзалт хийrжээ.  Мөн энэ хугацаанд АТГ-ын мөрдөн шалгах хүрээнд Хөгжлийн банкнаас зээл авсан чанаргүй зээлдэгчид болон холбоотой этгээдийн 170 орчим дансыг захиран зарцуулахад хязгаарлалт тогтоож, битүүмжлэн шалгаж байна.

Хөгжлийн банкны удирдлагууд өнөөдөр /2022.02.25/ мэдээлэл хийх үеэр тус банкны Үйл ажиллагаа хариуцсан дэд захирал Ж.Эрхэмбаатар дараах мэдээллийг өглөө.

 Тэрбээр  "Зээлдэгчид Монгол Улсын хөгжил цэцэглэлтэд үнэтэй хувь нэмэр оруулах том үйлдвэр байгуулсан гэж ярьж байгаа. Гэвч энэ бол тухайн хүний л бизнес. Тэр хүн л хувьцаа эзэмшиж, ашгийг нь  хүртэж байгаа. Монгол Улсын төлөө үйлдвэр байгуулсан байхад Хөгжлийн Банк хурааж, үйл ажиллагааг нь зогсоох гээд байна гэдэг мэдээлэл үндэслэлгүй.  Дээр нь эдгээр зээлдэгч нар 1000-1200 хоног үндсэн зээл, зээлийн хүүгээ төлөөгүй, уулзаа ч үгүй. Тиймээс энэ асуудал энгийн зээлдэгч, зээл олгогчийн хоорондоо учраа олдог арга хэрэгслээр шийдэгдэхгүй хэмжээнд очсон байгаа" гэв.