Цемент үйлдвэрлэгч дөрвөн компанийн цахилгаан дулааныг төрөөс даах эсэхийг судалж байна

Манай улс өнөөдрийн байдлаар цементийг 100  дотоодоосоо ханган нийлүүлж байгаа. Энэ төрлийн бараа хомстолгүй байгаа ч өнгөрсөн долоо хоногт цементийн үнийг дотоодын үйлдвэрүүд өсгөсөн. Тухайлбал, нийт дөрвөн үйлдвэр  болох "МАК цемент" ХХК  28.6 хувиар үнээ нэмсэн бол "Хөтөлийн Цемент шохой" ХК задгай цементийн үнийг 26 хувиар, Монцемент ХХК уутай цементийг 27.3 хувиар, задгайг нь 30.6 хувиар,  Төв аймгийн Сэргэлэн суманд үйл ажиллагаа явуулдаг "Мөнхийн баянгал" ХХК 15 хувиар тус тус цементийн үнээ нэмсэн. 

Дээрх байгууллагууд үнээ үндэслэлтэй нэмсэн эсэхийг тогтоохоор ШӨХТГ-аас шалгалт хийжээ. Шалгалтаар  түүхийн эдийн үнийн өсөлт нөлөөлсөн гэдгийг тогтоосон байна. Тиймээс БХБЯ талуудыг хүлээн авч гурван ч удаа уулзалт хийхэд ААН-үүд дараах гурван саналыг тавьсан талаар  Б.Мөнхбаатар сайд хэллээ. 

Үүнд:

• Хөгжлийн банкны зээлээ шийдүүлэх
• Цахилгаан эрчим хүчний хөнгөлөлтөд хамрагдах. Дээрх дөрвөн  компани 2021 онд ашигласан эрчим хүчнийхээ хэрэглээг өртгөөр нь тооцоод энэ онд хэдэн төгрөг зарцуулах уу гэдэг тооцооллыг БХБЯ-нд ирүүлсэн байна. Хэрэв эрчим хүчний хэрэглээг нь төрөөс тэглэлээ гэж тооцвол хагас жилийн 20 гаруй тэрбум төгрөгийн зардал гарах аж. 
•  НӨАТ-аас чөлөөлүүлэх гэсэн  эдгээр гурван шаардлагыг тавьжээ. Эхний хүсэлт нь БХБЯ-нд хамаарагдахгүй учир шийдвэрлэх боломжгүй гэдгээ хэлж, эрчим хүчний хөнгөлөлт үзүүлэх асуудлыг судалж, ирэх долоо хоногт Засгийн газрын хуралдаанаар танилцуулахаар болжээ.