Х.Баттулга: АН-аас гишүүн, сайд, Ерөнхийлөгч болж байсны хувьд намынхаа энэ үед л өөрийнхөө хүчийг нэмэрлэе гэж шийдсэн

Ардчилсан намын  даргын сонгуульд нэр дэвшигчид  өнөөдөр /2022.03.18 /дөрөв дэх аймагтаа  ажиллаж байна. Тодруулбал, Ардчилсан намын даргын сонгуульд нэр дэвшигч Халтмаагийн Баттулга, Жамбын Батсуурь нар Дорноговь аймгийн гишүүд, дэмжигчиддээ бодлого, мөрийн хөтөлбөрөө танилцууллаа. 

АН-ын даргын сунгаанд Ерөнхийлөгч асан Х.Баттулга нэрээ дэвшүүлсэн нь олон нийтийн анхаарлын төвд байгаа юм. Үүнд тэрбээр Дорноговь аймагт хийж буй уулзалтынхаа үеэр ийн тайлбар өглөө. Энэ тухай хэлсэн үгэндээ "АН-ын өнөөгийн нөхцөл байдалд дүгнэлт хийлээ. АН-аас гишүүн, сайд, Ерөнхийлөгч болж байсны хувьд намынхаа энэ үед өөрийнхөөө хүчийг нэмэрлэе гэж үзээд би намын даргад өрсөлдөх шийдвэрээ гаргасан. "Хэрэв би намын дарга болвол тамганыхаа асуудлыг нэн түрүүнд цэгцэлж, нэг тугийн дор байлгана. Ардчилсан үзэл бодолтой хувь хүн, хувьсгалчид, бусад намыг эгнээндээ нэгтгэн ирэх 2024 оны УИХ-ын сонгуульд ялалт байгуулна гэсэн гурван зүйлийг баримталж байна.  Тамга тэмдгийн маргааныг цэгцэлж, эвлэлдэн нэгдснийхээ үндсэн дээр 2024 олонх болцгооё. Яаж эвлэлдэн нэгдэх вэ гэвэл би 2017 оны Ерөнхийлөгчийн сонгуулиар  улс төрийн үзэл баримтлал нэгтэй намуудыг нэгтгэж "Монгол ялна" гэсэн уриатайгаар оролцож тухайн үед УИХ-д  65 суудалтай байсан МАН-ын эсрэг эвлэлдэн нэгдэн ялалт байгуулсан.

 Өнгөрсөн оны орон нутгийн сонгуулиар 21 аймгаараа тойрч улс төрийн үзэл баримтлал нэгтэй намууд, бие даагчдыг нэгтгэж өнөөдөр найман аймагт АН засаг барьж байна. Өдгөө УИХ-д 62 суудал авч олонх болсон МАН улсын хэмжээнд нийт сонгогчдын 44 хувийн саналыг авсан нь хангалтгүй үзүүлэлт буюу шударга бус. Хэрвээ намууд эвлэлдэн нэгдэж чадвал бид 56 хувиас дээш хувиар сонгогчдын саналыг авч чадна гэсэн үг. Ингэж чадвал бид олон болно. Бидэнд суурь нь байна" гэлээ.